Меншыны стрітили ся з делеґаційов Рады Европы

В днях 6-го аж 10-го септембра 2021-го року є на навщіві Словакії делеґація порадного комітету Рады Европы ку Рамковому договору о охороні народностных меншын.

Делеґація робить моніторінґ в контексті 5-го ціклу моніторованя імлементації Рамкогового договору. В складі делеґації суть Альона Ґроссу з Молдавії, Александра Кастро з Портуґалії і Мікко Пуулмалаінен з Фінландії.

5-ый моніторінґ на Словакії

Словакія Рамковый договор на охорону народностных меншын підписала у 1995-ім році і остатній моніторінґ проходив в році 2014 з тым, же становиско комітету з моніторінґу, котре обсяговало рекомендації про Словацьку републіку, якы выходили з того, на што меншыны вказали як проблематічне, было публіковане в році 2015.

В рамках 5-го моніторінґу в Словацькій републіці была стріча з меншынами доїднана на 6-го септембра в Братіславі, і 7-го септембра в Пряшові. На стрічі в Пряшові брали участь ромска, русиньска і україньска народностна меншына. Обговорити ся мав період од остатнього моніторінґу.

Обговорили ся найважнішы темы

За Русинів на стрічі были участны Люба Кральова, директора Словацького народного музея – Музея русиньской културы (СНМ-МРК), Яна Трущіньска-Сива, так само із СНМ-МРК, Зденка Цітрякова і Михал Павліч із Інштітуту русиньского языка і културы Пряшівской універзіты в Пряшові, як і Петро Медвідь, представитель Русинів у Выборі про народностны меншыны і етнічны ґрупы Рады влады Словацькой републікы про людьскы права, народностны меншыны і родову рівность.

Делеґацію Рады Европы інтересовали головно темы условій высокошкольскых штудій языків і култур споминаных меншын, условія народностностного школства обще, ці підпора розвитку културы народностных меншын на Словакії. Бісіда была і о фунґованю народностных музеїв споминаных меншын.

На стрічі участны обговорили і тему, яка є повязана з приготовліньом закона о поставліню народностных меншын, кедьже делеґація інтересовала ся, в чім бы меншынам даный закон мав помочі.

Оцінка з 5-го моніторінґу бы подля слов Альоны Ґроссу, котра вела стрічу з меншынами, мала з боку порадного комітету быти готова в октобрі того року.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА