Голосник

Метрополіта Йоан премєрови: В боротьбі проти пандемії треба і духовну поміч

Словацька републіка має од суботы 21-го марца 2020-го року новый владный кабінет, котрый веде премєр Іґор Матовіч. Владу в суботу выменовала презідентка Словакії Зузана Чапутова.

Нова владна коаліція выникла по парламентных выборах, котры проходили 29-го фебруара, і в їй складі суть штири політічны субєкты – рух OĽaNO (Obýčajní ľudia a nezávislé osobnosti – Обычайны люди і незалежны особности) премєра Іґора Матовіча, і партії Sme rodina (Сьме родина) Бориса Коллара, котрый став председом словацького парламенту, Sloboda a Solidarita (Слобода і Солідарнсть) Ріхарда Суліка і партія Za ľudí (За людей) бывшого словацького презідента Андрея Кіскы.

Нова влада ся хопила властей в якбач найскладнішій сітуації, яку світ пережывать, кедь країны мусять бороти ся з пандемійов нового тіпу коронавірусу.

Премєрови заґратуловав метрополіта

Новому премєрови і владі ку выменованю своїм писмом заґратуловав в неділю 22-го марца і владыка Йоан Бабяк, ґрекокатолицькый архієпіскоп пряшівскый, метрополіта Словакії.

„Стоїть перед вами нелегкый період боротьбы проти пандемії, што є першов задачов влады. Наслідно вас чекать рішіня далшых безодкладных проблем. Выпрошую вам повность дарів Святого Духа і дар єдности при ряджіню нашой країны. Молю ся, жебы ся вам дарило позерати на добро вшыткых людей і моралне роснутя нашой сполочности, жебы вам Господь Бог благословив і хранив вас,“ пише метрополіта в писмі премєрови Матовічови.

Духовна поміч од ґрекокатоликів

Метрополіта в складных часах убезпечів нового премєра о духовній помочі, з котров може раховати од Ґрекокатолицькой церькви на Словакії.

„Проти пандемії коронавірусу будете бойовати людьскыма силами і вшыткыма людьскы доступныма средствами. Но за Ґрекокатолицьку церьков вас убезпечую і о духовній помочі, котру будете потребовати. Допроваджаме вас своїма молитвами, жертвами і постом,“ написав владыка Йоан премєрови.

В писмі далше найвысшый представитель ґрекокатоликів на Словакії дав цілу владу Словацькой републікы під покров Пресвятой Богородіці – Сімстрастной Дівы Марії, котра є покровительков Словакії, і в мені своїм і вшыткых єпіскопів Рады єрархів Ґрекокатолицькой церькви на Словакії владі поблагословив.

Публічны богослужіня суть дочасно позаставелны

На Словакії моментално не суть публічны богослужіня, вшыткы проходять за запертыма дверями.

Бывшый премєр Петер Пеллеґірні 10-го марца оголосив, же з платностьов од 11-го марца заказує ся в повязаню з боротьбов проти пошырьованя нового коронавірусу, вшыткы публічны богослужіня. Наряджіню ся такой в той день, хоць з выражіньом болести, підпорядковали три найвекшы церькви на Словакії – Римокатолицька церьков, Євангелицька церьков авґбурзького віроісповіданя і Ґрекокатолицька церьков.

Православна церьков іщі 10-го марца выдала выголошіня, в котрім выразила, же богослужіня і причастя не можуть быти жрідлом хвороты і так буде публічно служыти далше. О день пізніше зрушыли публічны богослужіня і православны. Меджі єдным і другым выголошіньом православных єпіскопів їх стигнув бывшый премєр скрітіковати за неодповідность і повісти, же на них мінить свій погляд.

Наперед были публічны богослужіня позставелны до 23-го марца, моментално є ясне, же ся в тім буде продовжовати аж до 31-го марца. Римокатолицька єрархія уж припустила, же без публічных богослужінь буде тот рік проходити може і Великдень.

Церькви зато забезпечують оналйн высыланя з богослужінь і апелують на вірных, жебы ся духовно спаяли через тоты высыланя із своїма священиками і єпіскопами. Высыланя через соціалны сіті роблять многы священици, ґрекокатолици мають і можливость смотрити богослужіня посередництвом властной телевізії Logos TV, котра высылать через свій Youtube канал з катедралных соборів у Пряшові, Кошыцях, Братіславі, Ужгороді, Пармі (в США), але так само з путницькых місць в Лютині, Клокочові, Літмановій і базилікы в Михалівцях.

Много з тых жывых переносів можуть люди смотрити і у высыланю локалного телеканалу Televízia Zemplín.

Жрідло фотоґрафії: grkatpo.sk

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

 

 

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі