Голосник

Міністер деклярує підпераня нацийональных і етнічных меншын

В середу, 7. жолтня/октобра 2020 р., проходило в Варшаві святочне засіданя Спільной Комісиі Уряду та Нацийональных і Етнічных Меншын Польской Республикы. Стріча была принагідна, понеже споминало ся на ній 15 років фунґуваня Комісиі.

В засіданю окрем представників поєдных нацийональных і етнічных меншын взял участ Міністер Внутрішніх Справ і Адміністрациі. Ден перше одбыло ся засіданя меншыновой страны Комісиі.

Підпертя меншын

Посліднє засідня СКУтНіЕМ одбыло ся з нагоды одзначыня 15-літя фунґуваня Комісиі. В засіданю, окрем постійных членів Комісиі, участ взяли запрошены гості, в тым шеф ресорту, до котрого приналежыт речена Комісия, Міністер Внутрішніх Справ і Адміністрациі Мариюш Каміньскій.

В своім выступліню бесідувал він м.ін., што уряд влады підперат меншыновы права до реалізациі іх основных вартости, а заєдно ґарантує іх респектуваня. «Ситуациі, коли дахто спрібує порушыти сесы права, будут стрічати ся з міцном реакцийом польской державы, котрой меншыны сут спілгромадянами», деклярувал шеф МВСіА. Додал, же Польща буде хоронила громадян, якы приналежат до поєдных нацийональных і етнічных меншын.

Дальше Каміньскій пояснял, што нацийональны і етнічны меншыны то культурове богатство Польщы, отримане в спадковині по І Польскій Республиці. «Польска Республика вельох наций, вельох культур і реліґій. Єст то про нас барз важна вартіст, на котру мусиме дбати» – продолжал.

Звертаючы ся до присутных представників меншын, бесідувал, што каждый має право до свобідного культивуваня свойой достоменности. Подля слів міністра єст то фундаментальне і ненарушальне право.

Ювілей СКУтНіЕМ

Присутніст вельох запрошеных гостів, в тым шефа МВСіА была спричынена і тым, што з нагоды ювілею діяльности Комісиі были признаны і державны одзначыня. Постановом Президента Польской Республикы на внесок Міністра Срібрный Крест Заслугы отримали представникы ормяньской і татарской меншын.

«Тых пятнадцет років спілпрацы переконує нас, же то барз добре розвязаня. Тота Спільна Комісия, котра єст місцьом діалоґу, місцьом бесіды, місцьом выпрацовуваня спільных, добрых розвязань для вшыткых громадян польской державы. То єст добре місце спілпрацы для дежравы і для меншыновой страны», підчеркнул в своім выступліню Блажей Побожый, віцеміністер МВСіА і спілведучый з урядовой страны СКУтНіЕМ.

Дальшы темы засіданя

Ден перше перед офіцияльным засіданьом СКУтНіЕМ, в віторок вечер, 6. жолтня/октобра, представникы меншыновой страны зобрали ся на робочій стрічы. На засіданю меншыновой страны Комісиі бесідувано м.ін. про проґрам слідуючого, святочного засіданя СКУтНіЕМ, як тіж про справу одповіди уряду на документ пн. «Нацийональны і етнічны меншыны – найважнійшы проблемы середовиска нацийональных і етнічных меншын». Была і тема меншыновой ситуациі в добі пандеміі коронавіруса. Представникы меншын дискутували і про систем онляйн до складаня внесків о дофінансуваня ґрантів.

На середовым засіданю вшыткых членів Комісиі в другій части, по офіцияльным одсвяткуваню 15-літя діяльности, были меньше-веце дискутуваны темы, якы ден скорше пробесідувала меншынова страна. Презентуваны были і заложыня Проґраму Социяльной і Громадяньской Інтеґрациі Ромів в Польщы на рокы 2021-2030. Важном темом, котра тыкала ся порушыня меншыновых прав, была бесіда про знищыня цмонтеря старообрядовців в Бялоґурах.

фот. МВСіА / Twitter

Шеруй.

О авторі

Севериян Косовскiй

Народженый на чужыні. Матуриста з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Головный редактор Лемківского Річника. Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментарі