Міністер Клімкін признав Русинів

Хоць Київ офіціално не вызнавать Русинів на Україні як окремый народ, і русиньска меншына є вызнана лем Закарпатьсков областнов радов од 2007-го року, міністер загранічных діл Україны говорить о тім, же в Закарпатьскій области Україны жыють Русины.

Павло Клімкін, котрый веде україньскый резорт діпломації, говорив о Русинах в проґрамі Сніданок з 1+1, повідомлює портал ТСН.

„Закарпатя не мож порівньовати із Донбасом. Закарпатя складне: там суть Мадярі, Румуны, Русины,“ повів Клімкін, котрый єдночасно підкреслив, же каждый зо спомянутых народів выжадує окремый приступ. Без такой політікы і окремого приступу ку каждій меншыні подля головы україньской діпломації нич не буде. За його думками Українці мають тым меншынам зрозуміти і помочі їм.

Клімкін так само звернув увагу, же не Мадярьско має помагати Закарпатьскій области, а Україна. „В крайнім припаді мы вєдно із Мадярями, а не Мадярі самы, як то є днесь,“ думать україньскый міністер, котрый є пересвідченый, же Україна не має делеґовати старостливость о своїх жытелів мадярьского походжіня на іншу державу. Мадярьско уж довшый час многыма формами помагать жытелям Закарпатьской области Україны, ці фінанчно або і можливостьов здобыти мадярьске гражданство, а такым способом і мадярьскый паспорт, значіть паспорт державы Шенґеньского простору.

Перед часом зрядили в Мадярьску функцію міністерьского уповномоченого про економічный розвиток Закарпатьской области і про розвиток мадярьскых школ в карпатьскім облуці.

Жрідло фотоґрафії: www.tochkazoru.pp.ua

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА