Міністер Лайчак нагородив Александра Дулебу

Міністер загранічных діл і европскых справ Словацькой републікы Мірослав Лайчак уділив у понедільок 9-го марца 2020-го року Золоты плакеты міністра.

Плакеты дістали орґанізація GLOBSEC, представитель мімовладного сектора Павол Демеш, соціолоґічка Ольґа Дярфашова, експерт на міґрацію Владимір Шімоняк, діпломат Марцел Пешко і аналітік Александер Дулеба. Інформовала о тім аґентура ТASR.

Дулеба собі оцініня одніс за особностный і фаховый вклад при оціньованю і аналізі прямованя загранічной політікы і презентації їй пріоріт словацькій верейности.

Александер Дулеба є політолоґ, універзітный педаґоґ і аналітік. Учіть на Пряшівскій універзіті в Пряшові і є там ґарантом штудійноого проґраму політілоґія. Окрім того од 1995-го року робить дослідника у Slovak Foreign Policy Affairs (Словацька орґанізація про загранічну політіку), де ся занимать баданьом загранічной політікы Словацькой републікы, домашньов і загранічнов політіков країн бывшого Совітьского союзу, головно Росії і Україны, европсков політіков сусідства і енерґетічнов політіков Словацькой републікы, ґрупы V4 і Европской унії.

Дулеба быв од децембра 2012-го року до яри 2014-го року першым председом Округлого стола Русинів Словеньска. Про свої робочі обовязкы не хотів веце кандідовати на тоту функцію, но єдночасно з тым і далше зістав головным коордінатором документу під назвов Проґрам розвитку русиньской народостной меншыны в Словацькій републіці, котрый ОСРС закінчів і прияв в маї 2015-го року.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА