Міністерка културы навщівила в Пряшові русиньскый музей. Музей потребує реконштрукцію

В пятніцю 25-го авґуста 2023-го року выконала робочу навщіву Пряшова міністерка културы Словацькой републікы Сілвія Гронцова. Шефка резорту културы навщівила Музей Соливар і Штатну наукову бібліотеку.

Пополідне завітала Гронцова до Словацького народного музея – Музея русиньской културы. Вєдно з ньов на робочій стрічі з директорков музея Любов Кральовов были участны і ґенералный директор Словацького народного музея (СНМ) Браніслав Паніс а ґенералный директор Секції културной дідовизны і державного языка на Міністерсві културы СР Радослав Раґач.

Повірена міністерка културы Гронцова навщівила русиньскый музей як першый шеф резорту културы обще.

Музей потребує реконштрукцію

По прівітаню міністеркы културы в просторах пряшівского музея проходило курте робоче їднаня меджі представителянми міністерства, ґенералным директором СНМ і директорков СНМ – Музея русиньской културы.

Пак директорка Кральова цілу делеґацію познакомила з просторами музея. Вказала їм постоянны експозіції і актуалну выставу двох молодых русиньскых вытварників, котрой вернісаж одбыла ся лем день перед навщівов міністеркы.

Хоць в остатнім часі під веджіньом директоркы Любы Кральовой подарило ся зреконштруовати часть просторів і створити достойны выставны просторы під назвов Выставна сала Михала Дубая, музей потребує комплексну реконштрукцію.

Русиньскый музей мать стару електроіншталацію, будова має злу енерґетічну ефектівность, бракує і безбарьєровость, котра є днесь в такых інштітуціях вже нормов. Оправити потребує і фасада, котра ся в дакотрых частях розпадать.

На цілкову реконштрукцію суть в старій касареньскій будові, яка стала будовов русиньского музея, потрібны міліоны евр.

СНМ – Музей русиньской културы не міг черьпати европскы грошы на реконштрукцію з Плану обновы з двох причін. По перше, з даного плану могли черьпати на Міністерстві културы лем будовы, котры суть історічны памяткы. По друге, музей мусить мати наперед выпрацованый проєкт реконштрукції, а тот затля не є. Лемже на проєкт треба так само грошы, а не мало.

Простор про русиньску комуніту

Міністерка културы Гронцова по познакомліню ся із обставинами повіла, же не хоче бісідовати допереду односно фінанцій, но думать, же є барз важным добрі приготовити проєкт, проєктову документацію і на основі того бы ся дало становити, кілько фінанцій і з якых джерел бы на русиньскый музей могло іти.

Як скоро ся тото вшытко приготовить є притім важным, бо в посліднім часі барз роснуть ціны ставебных матеріалів і ставебных робот. Лем од посліднього одгаду сумы на реконштруцкію ся ціны піндяли о міліон евр.

Ґенералный директор Браніслав Паніс повів, же на реконштрукцію мусить зробити ся архітектонічный конкурз, но він сам уж має представу, як бы міг по реконштрукції музей фунґовати.

Хотів бы наприклад, жебы то быв простор про цілу русиньску комуніту, жебы была в новых просторах і сала, де бы ся Русины могли стрічати, або бы там могли фунґовати і фолклорны ансамблі.

Теперь, в найблизшім часі, хоче СНМ од міністерства грошы на выпрацованя проєктовой документації, на основі чого бы пак могли глядати ся грошы на цілкову реконштрукцію.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА