Міністерство інвестіцій в окресі Снина рішыло підпору сел

Міністерство інвестіцій, реґіоналного розвитку і інформатізації Словацькой републікы од пятніці 7-го марца 2025-го року спустило можливость здобыти про реґіоны понад 30 міліонів евр. Інформовала о тім аґентура TASR.

Про села до 1000 жытелів выголосило міністерство вызву з назвов Жыве село. Як повів у пятніцю на резортнім дні в Довгім над Цірохов, Сниньского окресу, міністер Ріхард Раші, на реалізацію проєктів є выділеных понад 4 міліоны евр із державного розрахунку.

„Тоты найменшы села, котры мають до 1000 жытелів, і є їх на Словакії понад 2000, будуть годны черьпати фінанчны средства, і кедь ся їм то дотеперь не дарило,“ доповнив Раші. Припоминаме, же Русинами населены села суть векшынов до 1000 жытелів, належать ку так званым малым селам.

Вызва, котру резорт інвестіцій спустив, є заміряный на підпору турістічного руху, захованя културной ідентіты, стараня ся о културну дідовизну, і розвиток гражданьской інфраштруктуры. Із вызвы будуть підпорены такы проєкты як реконштрукції деревяных храмів, реконштрукції войновых цінтерів, накупліня фолклорных кроїв ці забезпечіня музичных інштрументів. Вызва є одкрыта про проєкты із цілой теріторії Словакії.

Далшов формов помочі реґіонам в рамках веце як 30-міліонового паклика грошей є вызва на центры діленых служеб. Выникнути їх має 21, і їх цільом є сполочне выконованя аґенды самоспсрав. Подля міністра Ріхарда Раші із той вызвы будуть підпорены адміністратівны, технічны і аналітічны капаціты, значіть фаховы робітници.

Державный секретарь Міністерства інвестіцій, реґіоналного розвитку і інформатізації Словацькой републікы Михал Калиняк акцентовав, же то пілотный проєкт. „Віриме, же обстоїть. Частков центрів діленых служеб буде веце як 400 самосправ, котры суть домовом про веце як 570 тісяч жытелів,“ повів Калиняк.

В тім році продовжує і підпора найменше розвитых окресів, на котру є алокованых понад 11,5 міліона евр. Змінов закона о підпорі найменше розвитых окресів на закон о пріорітных окресах буде окрес Снина записаный до списку пріорітных окресів.

Припоминаме, же на списку найменше розвитых окресів у четвертім кварталі 2024-го року были і далшы окресы, в котрых жыє русиньске населіня – Свідник, Воронів над Топльов, Бардейов, Меджілабірці, Стропків і Стара Любовня.