ПСК, КСК і Закарпатьска область підписали документы ку основаню зґрупованя Вігорлат

Пряшівскый і Кошыцькый самосправный край із україньскым партнером засновали Европске зґрупованя теріторіалной співпраці Вігорлат (Európske zoskupenie územnej spolupráce Vihorlat s r. o.). Іде о перше таке словацько-україньске зґрупованя свого тіпу, і лем друге в рамках Европской унії.

Партнеры підписали основаючі документы в понедільок 6-го юла 2026-го року, інформовала говоркыня ПСК Даша Єленьова. Зґрупованя має трьох партнерів – Пряшівскый самоспавный край (ПСК), Кошыцькый самосправный край (КСК) і Закарпатьску областну раду.

Нова капітола односин

„Зґрупованя одкрывать нову капітолу словацько-україньскых односин із досягом на розвиток пригранічного реґіону. Днешнім підписом наша обща візія дістала ясну і офіціалну подобу, і бізовно не є формалнов штруктуров,“ повів председа ПСК Мілан Маєрьскый, подля котрого ся тым творить силный, реалный і модерный інштрумент, котрым ся надвязує на рокы будованой довіры, і трансформує ся то до модерного формату, котрый єдночасно одкрывать двері ку новым средствам із Европской унії.

„Вірю, же буде правдивым каталізатором розвитку, стабіліты і просперіты нашой сполочной теріторії,“ повів жупан Маєрьскый.

Зґрупованя Вігорлат подля председы КСК Растіслава Тырнкы „жытелям Кошыцьского і Пряшівского краю одкрыє двері ку новым проєктам, котры підвышать якость їх жывота в пригранічу.“

„Про нас є позітівнов вістьов, же здобудеме міцный інштрумент про ефектівніше черьпаня грошей із фондів ЕУ, і іншых меджінародных джерел,“ повів далше Тырнка, котрый припомянув, же основаня зґрупованя Вігорлат є і вызначным кроком ку залучіню Словакії до обновы Україны.

Култура, шпорт, але і еколоґія

Зґрупованя Вігорлат має быти выконным орґаном співпраці в области реґіоналного розвитку, драговой і біціґльовой інфраштруктуры, економікы, іновацій, наукы, баданя, як і турістічного руху а жывотного оточіня.

В центрі його увагы мають быти і темы людьскых джерел а освіта, здравотна і соціална опіка, як і підпора културы а шпорту. Так само будуть актівности цілены на еколоґічны темы, охрану природы ці біодіверзіты, і на взаємну поміч в припаді природных і іншых катастроф.

„Днесь є історічный день і історічна дія про нас вшыткых, нашы реґіоны і про нашы країны Словакію і Україну,“ повів за україньску сторону председа Закарпатьской областной рады Роман Сарай.

„Вірю, же тот договор не буде лем на папери, але же буде трансформованый до жывота в подобі множества зреалізованых проєктів,“ доповнив.

Першов задачов Европского зґрупованя теріторіалной співпраці Вігорлат буде выпрацованя стратеґії розвитку в окремых областях. На основі той стратеґії встановить ся список пріорітных проґрамів і проєктів, а єдночасно часовый і фінанчный грамоноґрам.

Вызначный крок підпореный діпломаційов

Основаня Европского зґрупованя теріторіалной співпраці надвязує на меджівладный Договор о черезгранічній співпраці меджі Словакійов і Українов із року 2000. Єдночасно є резултатом обовязків, котры выходять із Договору о співпраці із мая 2023-го року меджі ПСК і Закарпатьсков областнов радов. До ініціатівы залучів ся і Кошыцькый самосправный край, чім ся укріплять коордінованый приступ на шыршій теріторіалній уровни із оглядом на ґеоґрафічны, транспортны і общественны звязы із пригранічнов областьов на україньскім боці.

Тот вызначный крок підпорили свойов участьов представителі діпломатічных корпусів – посол Україны на Словакії Мірослав Кастран, ґенералный конзул Україны в Пряшові Володимір Камарчук, ґенералный конзул СР в Ужгороді Генріх Сасаі, як і експерты на загранічну політіку Александер Дулеба а Едуард Бураш.