Молодіжны варштаты церковного співу в Любіні

Православна парафія Святой Тройці в Любіні запрашат діти та молодіж на хоральны варштаты церковного співу. Стріча одбуде ся в днях 4.-5. червця т.р., в катехетычній сальці при любіньскій плебаніі.

Зголошыня будут приниманы до 29. мая т.р. Контакт за майлом любіньской парафіі: cerkiew_lubin@op.pl. 

Заохочаме взяти участ!

Православна парафія в Любіні офіцийно была основана 9. січня 1951, коли по долгых старанях Уряд до справ вызнань передал любіньскій громаді поевангелицку святыню. Неофіцийно, першы літургіі одбывали ся уж од 1949 рока, коли то на богослужыня доізджал о. Йоан Левяр з Зимной Воды. До 1958 рока церков в Любіні была філийом парафіі в Зимній Воді. В більшости любіньскы парафіяне то Русины, котры остали выгнаны в 1947 році з рідных сел на Лемковині. Долголітнім парохом любіньской церкви был добрі знаний лемківскій соспільности, о. митр. Михал Жук, котрий народил ся в 1939 році в лемківскым селі Перунка. Од 30. січня 2006 рока функцию пароха повірено о. Богданови Репелі. При парафіі, од 2007 рока вчыт ся лемківского языка. Днес, любіньска православна парафія то близко 350 осіб.