В православній Парохіі св. Миколая в Щеціні торжественно привитали мощы Господнього Креста, святого Миколая і святой Мучениці Великой Княгыні Єлизаветы Фйодоровной. Іконы з мощами та частины Господнього Креста были переказаны в щеціньскій церкви 15. січня/януара.
Іконы привитали паpохіяне щеціньской церкви з парохом о. Павлом Стефановскым. Пак одслужено Божеску Літургію, котру одправили: о. Анджей Демчук з Ґрифіц, ігумен Данііл Ірбітз з Монастыря Св. Георгія в Ґетшендорф, о. Пьотр Пахолков з Берліна, о. Марцін Прокопюк з Лобза і парох щеціньской парохіі о. Павел Стефановскій. Торжество прошло з благословліня владыкы Георгія, Архієпископа Вроцлавского і Щеціньского.
То уж другый раз, коли Фундация Св. Мученика Боніфатия дарувала парохіі святого Миколая в Щеціні іконы з мощами святых. В маю 2019 рока тота сама фундация передала щеціньскій парохіі іконы з мощами св. Великомученика Георгія і св. Теодора Ушакова. На челі делеґациі была председа Фундациі матушка Наталия Мєзенцева.
Мощы святого Миколая, тє. частина його кости, приіхали з італияньского Барі, а частина Господнього Креста была привезена з Кіпру.
На торжество прибыло много вірных не лем православной церкви, понеже святый Миколай вызнаный єст і католицкымa церквами.
фот. Матеуш Папке, Мацєй Папке
Коментарі