«Мосты Старосты 2018»: головна нагорода для лемківского ансамблю Серенча

В минулу пятницю, 26. січня/януара 2018 р., в ґорлицкым музею Дворы Карвациянів і Ґладышів прошла ґаля переданя нагороды «Мосты Старосты», яка є што рік вручана ґорлицкым старостом. Головна премія тогорічной, 18. едициі подіі трафила до лемківского фолькового ансамблю Серенча. 

Серенча амбасадором ґорлицкой землі

Староста ґорлицкого повіту, Кароль Ґурскі, передаючы перше оцініня на рукы членів Серенчы, схоснувал слова польской писменниці Мариі Кунцевичовой о тым, што […] музыка має корону в небі, але коріня в земли – тогорічны лавреаты сут того найліпшым приміром. Дальше староста пояснял, чом як раз Серенча отримала премію: Закорінены в земли своіх вітців і дідів. Міцно привязаны серед своіх родин. Фурт молоды, бо мают лем 20 років, але з великым творчым доробком, промуючым нематерияльны добра лемківской культуры і не лем. Іх музыка та спів порывают серця слухачы. Жыючы традицийныма вартостями і автентичном культуром, сут амбасадорами нашой Малой Вітчызны – Ґорлицкой Землі. Головна нагорода была передана Серенчы за выдатны осягніня в творчій інтерпретациі лемківской культуры інспіруваны фольклором. 

Штырі оцініня про штырі індивідуа

Кароль Ґурскі передал і дальшы штырі нагороды на рукы поєдных осіб, котры трудят ся на ниві промоциі культуры, істориі і музыкы реґіону. Перша з них трафила до Мариі Цетнаровской за пошырюваня погіряньской культуры. Другым оціненым был спілпрацівник редакциі ЛЕМ.фм, Даміан Новак, якій свою нагороду одобрал за документуваня і пропаґуваня локальной істориі. Як підкрислил староста, Д. Новак занимат ся тіж ґенеалоґійом, історичном демоґрафійом, архітектуром та промоцийом Низкого Бескіду і міста Біч за справом веденых ним інтернетовых сайтів. Третя нагорода з той сериі перешла в рукы Петра Новака (премію за музыка одобрала його жена) за выдатны осягніня в творчій інтерпретациі і промоциі блюсовой музыкы. Четверта признана была за осягніня в обшыри хоралистикы. Отримал ю Ян Выпасек, якій пасию до музыкы і співу успішно передає молодшым ґенерациям.

Нагорода для молодого творці

Од 2011 рока Староство орґанізує тіж нагороду про молодых здібных артистів, за іх шыроко поняты повязаня з культуром. Тогорічна премія в тій катеґориі признана была про Кристияна Дзєвановского – маляря, якій в своіх образах оддає красу Ґорлиц і реґіону. Є тіж автором містных муралів. 

«Мосты Старосты»

Од 18. років Ґорлицкє Староство передає нагороды за для выдатных творців і діячів культуры повязаных з ґорлицком земльом. За тот період часу, серед нагородженых премійом «Мосты Старосты» нашли ся лемківскы артисты і активісты. Спомянути мож м.ін. на Павла Стефановского, Ярослава Трохановского, Юлию Дошну, Романа Корбича, Анну Дубец ци о. Романа Дубеца. Ініциятором той нагороды в 2001 році был товдышній ґорлицкій староста – Анджей Вельц, а єй орґанізацию продолжали Вітольд Кохан, Мирослав Вендрихович, а од трьох років – Кароль Ґурскі.

На тогорічній ґали ґратуляциі в імени Рады Ґорлицкого Повіту передавал віцеведучий Роман Дзюбина. Подякуваня, желаня і ґратуляциі склала тіж ведуча Комісиі Едукациі, Культуры і Спорту Рады Ґорлицкого Повіту, Софія Каміньска. На завершыня подіі концерт дал лавреат головной преміі, колектив Серенча. 

 фот. Староство Повітове в Ґорлицях