Мож подавати номінації на Pro Arte Ruthenorum 2022

Як інформовав голова журі Націоналной премії за русиньске уменя імени Івана Манайла Pro Arte Ruthenorum – Андрій Манайло, уж мож подавати номінації на премію на 2022-ый рік.

Основателями премії за русиньске уменя є Світовый конґрес Русинів і Русиньске націоналне самосправованя міста Вац в Мадярьску. Премія была основаня почас 15-го Світового конґресу Русинів, котрый у 2019-ім році проходив у Любовняньскых купелях.

Затля двоми лавреаты

Цільом основаня премії є підпора і нагороджіня тых сучасных русиньскых умелців, котры свойов умелецьков творчостьов зробили значный вклад до розвитку і пропаґації світового русиньского уменя.

Премія, в рамках котрой лавреат дістане ґравірованый кріштальовый трофей з подобов Івана Манайла, діплом і матеріалну підпору умелецького діятельства на суму 200 000 форінтів (коло 530 евр), уділює ся од 2020-го року. О лавреатови вырішує журі Комісії про културу Світовой рады Русинів.

Першым лавреатом у 2020-ім році став русиньскый малярь із Підкарпатя Володимір Микита. З причіны пандемії му была премія передана аж у 2021-ім році. Лавреатом за 2021-ый рік став Владо Няряди із Сербії, і премію перевзяв за лавреата на 16-ім Світовім конґресі Русинів у Криниці Дюра Папуґа.

Номінації уж мож подавати

Подаваня номінацій уж было спущено на сайті премії. Номінації можуть приходити з цілого світа. У пропозіції на номінанта має быти його мено і коротка біоґрафія, обоснованя на номінацію і ілустратівный матеріал його тврочости.

Номінації мож передкладати тот рік до 15-го апріля. Святочне удільованя Націоналной премії за русиньске уменя імени Івана Манайла Pro Arte Ruthenorum одбуде ся почас Бєнале русиньской/лемківской културы в Криніці, котре буде проходити 28-го і 29-го мая того року.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА