Мукачівска єпархія вступила до юбілейного року

5-го януара 2021-го року быв на сайті Мукачівской ґрекокатолицькой єпархії публікованый Декрет владыкы Ніла Лущака, аспостольского адміністратора єпархії ad nutum Sanctae Sedis, в котрім выголошує Рік юбілеїв Мукачівской ґрекокатолицькой єпархії.

Декрет быв выданый іщі 25-го децембра 2020-го року. Адміністратор єпархії одкрім іншого обовязує в літурґічных єктеніях додавати окремы просьбы присвячены тому року і по богослужінях молити ся окрему молитву, яка є присвячена вшыткым в декреті споминамым юбілейным подіям „нашой богатой і благословленой історії“.

Юбілеї Мукачівской єпархії

У 2021-ім році выходить дакілько річніць, котры собі буде Мукачівска ґрекокатолицька єпархія – Матірь Церьков про далшы русиньскы єпархії, котры вдяка ньой выникли в Европі і в Америці, припоминати.

24-го апріля мине 375 років од Ужгородьской унії, значіть моменту, коли в 1646-ім році на замку Друґетів в Ужгороді 63 священиків обновило єдность із Апостольскым престолом.

Головным юбілейом є самособов 250-та річніця од канонічного ерґіованя Мукачівской єпархії з дня 19-го септембра 1771-го року. Цісарьовна Марія Терезія досягла зряджіня єпархії у Папы римского Климента XIV., котрый єй в тот день еріґовав булов Eximia Regalium Principum.

14-го апріля собі єпархія припомяне сторічніцю од народжіня мукачівского єпіскопа, священомученика Теодора Ромжы. З особов владыкы Теодора суть повязаны і далшы юбілеї. 27-го юна то буде двадцять років од його выголошіня за блаженого і 25-го децембра собі єпархія буде припоминати 85 років од єрейского рукоположіня Ромжы.

30-го октобра мине 30 років од часу, коли у 1991-ім році быв Ґрекокатолицькій мукачівскій єпархії, по довгых роках переслідованя і офіціалного неіснованя церькви, вернутый Катедралный Хрестовоздвиженьскый собор в місті Ужогород.

Так само собі буде єпархія припоминати сто років од народіжня своїх двох владыків – Йоана Семедія і Івана Марґітича. Владыка Семедій быв першым мукачівскым єпархом по обновліню церькви у 1989-ім році. Марґітич став втогды помічным єпіскопом.

Мукачівска єпархія

Мукачівска ґрекокатолицька єпархія є найстаршов русиньсков єпархійов, котра выникла по Ужгородьскій унії. Свій центер має в Ужгороді, де по девятьох роках (1780-ый р.) од еріґованя єпархії переніс ся єпіскоп Андрій Бачіньскый. Там єпархови служыть як катедралный храм Хрестовоздвиженьскый собор.

Якраз з ньой пізніше выникали одділіньом ся далшы єпархії і церьковны штруктуры, котры днесь як прямых або непрямых наслідників Мукачівской єпархії можеме найти на Словакії, в Мадярьску, Сербії, в Споєных штатах Америкы, Чеській републіці ці Сербії і Хорватії. На Словакії, в Мадярьску і США з ньой выросли метрополітны церькви.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА