Мурянків выклад про лемківску історию і культуру в Новым Санчы

В рамках діяльности Університету Другого і Третього Віку в Новым Санчы, в періоді од лютого/фебурара до червця/юнія 2018 р. сут орґанізуваны выклады про слухачів школы. На сайті істнуючого при римокатолицкій парохіі св. Духа в Новым Санчы Університеті, находит ся детальна розписка поєдных выкладів в літнім семестрі т.р.

В віторок, 24. квітня/апріля 2018 р. выклад пн. «Лемкы в істориі і культурі» выголосит найвыдатнійший сучасний лемківскій поета, Петро Трохановскій (Мурянка). Іщы кус часу до выкладу, та не задумувал єм ся детально, што буду хотіл повісти. Напевно, так си думам, што буду хотіл оповісти про такы фраґменты з нашой істориі і культуры, про котры нияк, або доцяп мало ся бесідує, повіл П. Трохановскій нашій редакциі.

Петро Трохановскій, окрем ріжного рода професийных робіт на народній і церковній ниві та залюбліня в поезиі і музыці, од молодых років інтересує ся м.ін. історийом, чого доказом сут його чысленны опрацуваня і передуманя тыкаючы ся істориі Русинів. Посліднім моноґрафічным трудом автора є монументальна «Книга Білцаревы», будуча джерелом історичных, ґеоґрафічных та культуровых інформаций не лем про тото єдно село, але і про цілу Сандецку Русь, ай загально Лемковину. Історичны дописы П. Трохановскій од років пибликує в «Лемківскых Річниках» та двомісячнику «Бесіда».

фот. Петро Басалыґа