Музей Варгола святкує 25 років

Енді Варгол і вдяка політічной сітуації в Чехословакії перед роком 1989 ниґда не быв в отцюзнині своїх предків. Напрік тому в Міджілабірцях, лем 15 кілометрів од села Микова, одкыль походили Варголовы родічі, по його смерти выникнув музей, котрый є присвяченый як раз тому світознамому умелцьови русиньского походжіня. Того року музей святкує 25 років од свого выникнутя.

Музей модерного уменя Енді Варгола в Міджілабірцях офіціално вынкнув 1-го септембра 1991-го року. В тім часі быв єдиным такым музейом на світі. Днесь є єдным із двох, но все зіставать єдиным в Европі. Другый такый музей є в америцькім Пітсбурґу. Джон Варгола, Михал Быцько і Михал Ціглаж были головныма ініціаторами выникнутя того музею.

Быцько зачав занимати ся варголовсков історійов іщі почас штудентьскых часів і поступно дійшов ку великому множеству цінных інформацій головно о походжіню умелця і дякуючі Варголовій найблизшій родині і ку жывоту і творчости Варгола. Джон Варгола, котрый умер у 2010-ім році, і котрый быв віцепрезідентом Фундації Енді Варгола про візуалне уменя в Ню Йорку цілый час музей в Міджілабірцях міцьно підпоровав.

Музей почас рока навщівують тісячі навщівників із цілого світа. Днесь є його зряджовательом Пряшівскый самосправный край. Окрім творчости Варгола в нім мож видіти і артефакты повязаны з умельцовым жывотом – окрім іншого і кошульку, в котрій быв похрещеный. Но так само ся там орґанізують і выставкы іншых сучасных умелців, ці різны културны події, події про діти і молодеж, все заміряны на вытварне уменя. В музею ся робить і освітня а науково-дослідніча діялньность в области сучасного вытварного уменя, музейоедуколоґії.

Офіціалны святкованя 25-го юбілею выникнутя музею будуть проходити в четверь 25-го авґуста 2016-го року. Святочна академія в кіносалі Музею модерного уменя Енді Варгола зачінать о 11.00 год. Окрім того є прогитоволеный і супроводный проґрам. О третій пополідне буде проходити інавґурація образів Кеіта Гарінґа, по ній на участных чекать вернісаж выставкы Їткы Копейтковой і Даніела Бродянія. Не буде браковати концерт ці театер. Детайлный проґрам найдете на плаґаті під статьов.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА