«Hulaty» то трансова музика з трансграничной обшыри, транслокация голосів і звучынь меншын до транснацийональных клюбовых просторів, то трансакция минулого з будучым, жебы істнувати і не быти забытым.
«Hulaty» то альбом, якій зродил ся з любови до експериментуваня і електронічной музикы до гуляня. Інспіруваный є традицийныма лемківскыма піснями, награный зо сучасныма артистами, якы співают в тым языку.
В 2019 році Стоваришыня «Руска Бурса» в Ґорлицях печатало платню з сучасном клюбовом музиком «Hulaty». До спілпрацы запрошено выдатных творців музикы – Шымонa Пьотровскoго, Сусанну Яру і Сестры Бочнєвич.
Вшыткы реміксы зреалізувал Шымон Пьотровскій (t dot est) – польскій перкусиста, продуцент, реалізатор звуку. Шымон єст ентузиястом отвертого і сучасного звучаня, занимат ся вельома жанрами музикы – од джазу і фольку по гіп-гоп і металь. Творіня електронічной музикы то дальша обшыр, в котрій успішні ся реалізує. Шымон Пьотровскій єст абсольвентом Технічного Університету в Кракові та подипломовых студий Music Production and Recording на Університеті в Ставанґер (Норвеґія). Од 2007 рока веде в Кракові своє студийо Psychosound та орґанізує краківскій фестіваль PsychoFest. Як інжынєр звуку спілпрацує з артистами з цілого світа.
Як перкусиста Шымон выступувал з більше як 40 артистами з Польщы і заграниці. Світ лемківской музикы познал завдякы Сусанні Ярій, был при початках єй карєры, перше як товаришучый музик (перкусия), пак спілтворили ансамбль QuadroSusanna.
На платни поміщено 10 творів, котры приносят нову якіст на лемівскым музичным рынку.
Платню зреалізувано завдякы фінансуваню Міністерства Внутрішніх Справ і Адміністрациі.
Коментарі