«Мы пастыре приходиме» – пренос з церкви Покровы Богородиці в Шамброні – Святый Вечер, 20.00 год.

29. грудня/децембра минулого рока, по шестый раз в селі Шамброн, на Спишы прошол рождественный концерт коляд і вінчувань.

Хоц шамбріняне святкуют Різдво за новым календарьом і были уж по святах, то запросили до себе  ґрупу колядників з сусідніх Баєровец. Пришли і інчы: «Яворина» з Торисок, «Тихопоточан» з Тихого Потока (д. Штельбах), «Кечера» з Якубян. Особливе значыня мал выступ сестер Угляровых з Блажова, села, котре столітями было при Шамброні, а днес го ніт. В давным селі выгородженый был поліґон, а люде выслены до світа. Фольклор, язык і звыкы з Левочскых верхів достойно плекают сестры Угляровы.

В проґрамі концерту, окрем хлопів з ґрупы «Шамбрінці», выступили і жены, і молоды, якы презентували різдвяный репертуар.

Концерт «Мы пастыре приходиме» зорґанізували: ґрупа «Шамбрінці», село Шамброн, грекокатолицка парохія в Шамброні і Русиньска Оброда на Словациі.