Мышпергачы помогли в ремонті креницкой церкви

Як заявлят сайт TVP Kraków, мышпергачы помогли в реставрациі даху забытковой грекокатолицкой церкви свв. апостолів Петра і Павла в Креници. Завдякы тому, же мешкают они під повалом креницкой святыні, повело ся ся єй вписати на листу хороненых обшырів Натура 2000, а што за тым іде – позыскати фонды на ремонт даху. Мышпергачы, котры жыют в креницкій святыни, приналежат до барз рідкого ґатунку, котрий по ремонтах буде міг дальше еґзистувати під повалом креницкой церкви.

Цілий кошт ремонту то понад 1 милийон злотых. Як бесідує в материялі для польской телевізиі парох грекокатолицкой громады в Крениці – о. Йоан Піпка, без мышпергачів парафія николи не змогла бы в такым виді реставрувати повалу. О. Піпка жартує, же пришло му служыти не лем людям, але і мышпергачам.

Ремонт обнял выміну деревяной констуркциі та покрытя мідяном бляхом цілого даху. За приведеным горі мотузком, можете обізрити коротку відеореляцию з проведеных рементовых прац.

Грекокатолицка церков свв. апостолів Петра і Павла в Креници была побудувана в роках 1872-1879. Є святыньом муруваном з цеглы та каміня, по части отынкувана. Церков має єдну наву з трансептом, котру заперат узша презбітерия. Святыня мат 7 банястых вежычок, зо сліпыма літарнями. В церкви заховали ся цінны бічны олтарі з ХІХ ст. По выгнаню в 1947 році святуню служыла римокатолицкым вірным. До рук грекокатолицкой церкви вернула в 1982 році. Парафія приналежыт до краківско-креницкого деканату перемышльско-варшавской митрополиі. Креницка святыня свв. Петра і Павла єст єдном з більшых церкви на Лемковині, мала служыти як єпископска катедра.

Головне фото – прінтскрін за: http://krakow.tvp.pl/23580753/nietoperze-pomogly-w-remoncie-cerkwi-w-krynicy-zdroju.