На Богоявленіє в Старій Любовні служыли в сканзені, в Якубянах посвятили і потік

В понедільок 6-го януара 2020-го року восточны хрістіаны, котры ідуть за новым календарьом, святковали праздник Богоявленія. Меджі них належать і русиньскы ґрекокатоликы, котры жыють на Словакії.

З той нагоды ся в Старолюбовняньскім окресі одбыли події, котры мають в тій части северовыходной Словакії вже свою традіцію.

Служба в сканзені

В деревяній Ґрекокатолицькій церькви св. Михаіла Архістратига, котра походить зо села Матисова, в понедільок пополідне служыла ся Божественна літурґія, по котрій слідовало велике посвячіня воды. Церьковнославяньску літурґію служыв любовняньскый парох Ондрей Пацак з Конґреґації Найсвятішого Ізбавителя (редемпторісты).

По церьковных обрядах, в рамках котрых была і процесія з іконами, слідовало пасмо колядованя, з котрым выступила Фолклорна ґрупа Яворина з Торісок.

Посвятили Якубянку

В Якубянах посвятив ґрекокатолицькый парох Павел Валько по торжественній літурґії і містный потік Якубнянка. Іде о стару традіцію, котра ся вже не барз дотримує.

Як повів Валько, в минулости ся вода все посвятила і в потічках ці ріках на парохіях, но з причіны, же водны токы ся зачали забруджати, тота традіція поступно у векшыні парохій цалком счезла. Але то не є припад Якубян, бо сельксый потік є жрідлом воды на питя нелем про містных, але і про села в околіці, значіть вода є чіста.

„Віруючі собі пак воду з потічка беруть, вірять, же має силу лічіти, же охоронить перед різныма хворотами, помагать їм в різных жывотных сітуаціях,“ повів Валько, котрый є в Якубянах вже девятый рік. Містны віруючі собі за його словами беруть воду з Якубянкы приблизно два тыждні.

На посвячіня воды в Якубянці звыкнуть ходити нелем містны віруючі, але і люди зо сел околіці, так тому было і тот рік.

Жрідла фотоґрафій: Любовняньскый музей і село Якубяны.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА