Голосник

На будові вязніці в Леополдові одкрыють таблу єпіскопови Ґойдічови

В понедільок 25-го мая на будові Заряджіня на выконаня кары однятя свободы в Леополдові буде одкрыта памятна табла пряшівскому єпіскопови, блаженому Павлови Петрови Ґойдічови ЧСВВ, котрый быв удостоєный і тітулом Справедливый меджі народами.

Як інформовала Пресова канцеларія Конференції єпіскопів Словакії (TK KBS), памятну таблу в дополідняйшых годинах одкрыють пряшівскый архієпіскоп і метрополіта Словакії Йоан Бабяк, підпредседа Централного союзу жыдівскых реліґійных общін в Словацькій републіці Іґор Рінтел і председа Народной рады Словацькой републікы Борис Коллар.

На одкрытю будуть брати участь і председа Тырнавского самосправного краю Йозеф Віскупіч а ректор Тырнавской універзіты Рене Білік.

Напланована і конференція

В тот самый день пополідне буде проходити онлайн конференція о жывоті блаженого єпіскопа Павла Петра Ґойдіча і о діалоґу меджі хрістіанами і жыдівсков комунітов.

Выступати на ній будуть реномованы особности із Словакії, но і зо заграніча. Вступне слово буде мати кардінал Курт Кох, председа Папрской рады на підпору єдности хрістіанів. Конференція без презенчной участи лекторів буде в прямім ефірі высылана на сторінці Židia na Slovensku на сіті Facebook.

Обидві події суть резултатом інтензівной, консензуалной і хосенной співпраці Централного союзу жыдівскых реліґійных общін в Словацькій републіці і хрістіаньскых церьквей на Словакії, інформовала пресова канцеларія.

Справедливый меджі народами

Перед 70-ма роками одбыв ся такзваный Пряшівскый собор. Комуністічны власти ним на довгы рокы заказали Ґрекокатолицьку церьков у втогдышній Чехословакії. Многы ґрекокатолицькы священици і єпіскопы скінчіли в леополдовскій вязніці.

Меджі нима быв і єпіскоп Павел Петро Ґойдіч, котрый перед 60-ма роками у вязніці вмер. Но і там, в строго стороженім арешті, зістав вірный своїм вартостям. Якраз тоты му не дали пасівно призерати ся на траґічну долю словацькых Жыдів у войновых часах.

Сам многых уратовав. За тото быв удостоєный in memoriam престіжным тітулом удільованым тым, котры уратовали Жыдів – Справедливый меджі народами. І зато є єпіскоп Павел Петро Ґойдіч окрім іншого і сімболом одвагы і порозумліня меджі хрістіанами і Жыдами.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі