На міністерстві выникла робоча ґрупа про русиньске школство

Як інформовав офіціалный сайт Міністерства школства, наукы, досліджіня і шпорту Словацькой републікы, 11-го юла 2016-го року была в повязаню із повніньом Проґрамового выголошіня влады на 2016-ый рік сотворена на міністерстві робоча ґрупа, котра буде під веджіньом штатного тайомника Петра Крайняка робити в области політікы народностных меншын. Першу стрічу одкрыв міністер школства Петер Плавчан.

Цільом робочой ґрупы є выпрацованя Концепції розвитку навчаня русиньского языка і културы в матерьскых школах, основных школах і середніх школах в Словацькій републіці. „По тій стрічі будуть слідовати іщі далшы дві. На першій стрічі сьме членам презентовали тринадцять тем, котры бы мали быти рішены. Так само было спомянуто, же бы ся мала міджі русиньскыма педаґоґами вытворити даяка орґанізація по взорі Союзу мадярьскых педаґоґів на Словакії,“ повів про нашу редакцію штатный тайомник міністерства школства Петро Крайняк.

Членове говорили о основных проблемах

На першій стрічі членове робочой ґрупы присвячали ся головно сполочному дефінованю основных проблемів в области навчаня русиньского языка, котрыма суть наприклад політіка учебників, брак школярів, співпраца зо зряджователями школ, мотівація і інформованость школярів ку навчаню русиньского языка. Говорило ся так само о можливостях рекваліфікації учітелів російского або україньского языків на навчаня русиньского языка, доповнив Крайняк.

Председом робочой ґрупы ся став Мґр. Марек Ґай, далшыма челнами суть – Доц. Анна Плішкова, Пгд. (Пряшівска універзіта), ПгДр. Люба Кральова (ОЗ Колысочка), Мґр. Мілош Стрончек (Церьковна ОШ св. Юрія у Свіднику), ПаедДр. Марцела Рунянінова (ОШ Кална Розтока), Мґр. Моніка Сірікова (ОШ Чабины), Мґр. Івета Мелнічакова (ОШ Коменьского в Міджілабірцях), ПгДр. Кветослава Копорова (Пряшівска Універзіта), Мґр. Анна Кузмякова (Русиньска оброда на Словеньску), Мґр. Владиміра Палфійова і ПгДр. Анна Бемерова (Одділіня школства Пряшівского самосправного краю).

„Люди до робочой ґрупы были покликаны прямо міністерством. Суть то люди, котры ся даякым способом актівізують в русиньскім школстві. Суть то або учітелі, котры учать русиньскый язык довгодобо, або суть то люди як я або пані Копорова, котры правда робиме у высокім школстві, но даякым способом сьме од зачатків были коло того школства, або ся актівізовали і про комунікацію зо школами, зряджователями школ і знаємє, якы суть основны проблемы нашых школ. Так само суть в ґрупі і представителі Пряшівского самопсравного краю,“ повіла про редакцію Анна Плішкова, директорка Інштітуту русиньского языка і културы Пряшівской універзіты в Пряшові, котра є так само у нововыникнутій робочій ґрупі.

Концепція є вже давно

„На стрічу єм принесла концепції, котры вже были приготовлены і схвалены в році 1996,“ доповнила Анна Плішкова. Втогды была концепція так само схвалена на міністерстві школства.

„Концепції на навчаня русиньского языка суть зроблены, акурат ся не реалізовали. Хыбыть орґан, котрый бы із боку державы контрольовав реалізацію той концепції, і котрый бы санкціоновав і напрямовав тоту роботу. О проблематіці бракованя такого контрольного орґану єм мала і реферат на посліднім языковім конґресі під назвов Русиньскый язык в школстві в контексті Европской хартына охрану рeґіоналных або меншыновых языків. Так само комітет експертів в каждій періодічній справі бракованя такого контрольного орґану крітікує односно Словацькой републікы. Покля не буде ініціатіва од державы, жебы сам властно дозерав над повніньом той концепції, так концепція знова буде лем даякый список, котрый ся заложыть до архіву,“ продовжовала Плішкова.

Слідуюча стріча робочой ґрупы є напланована на другу половину септембра. Стріча бы мала проходити в Пряшові.

Жрідло фотоґрафії: www.minedu.sk

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА