На обнову згорітой русиньской церькви в Празі вызберали уж міліон корун. Буде ся реконштруовати

У публічній збірці, котру выголосив Маґістрат міста Прага на обновліня пожаром зниченой Церькви святого Михаіла Архістратига із 17-го столітя, люди од їй выголошіня на зачатку новембра вызберали уж понад міліон чеськых корун. Інформовав о тім портал iRozhlas.cz.

Спомянута збірка іщі ани здалека не кінчіть. На обновліня церькви буде мож жертвовати грошы аж до 4-го новембра 2021-го року.

Давають і десяткы тісяч корун

Руйны церькви з Загароді Кіньскых, котра згоріла 28-го октобра того року, ся теперь документують, пак має выникнути конштрукція, котра буде хоронити части, якы ся сохранили.

Церьков была маєтком міста Прага. Якраз чеська столиця буде з выужытьом збіркы фінанцовати обновліня храму. „До збіркы залучують ся малы доноры, але і такы, котры давають десяткы тісяч корун. З причіны коронавірусовой крізы вшыткы будеме мати глубше до кешені, о то веце собі ціню людей, котры уж теперь на обнові деревяной Церькви святого Михаіла Архістратига беруть участь, і вшыткым дякую,“ повіла радна Прагы про културу Гана Тжештікова.

Ціна не є знама

Робітници з Народного памяткового інштітуту зроблять 3D скан руйн храму, пак буде слідовати його конзервація. В найблизшых тыжднях подля порталу одбуде ся коордічна стріча представителів головного міста з православным духовным храму, на котрій буде ся рішыти співпраца ці поміч з паспортізаціов і обновов інтерьєру.

„Того часу ся не дасть одгаднути, кілько буде цілково стояти реконштруцкія,“ повів про портал iRozhlas.cz говорця Прагы Віт Гофман.

Храм із 17-го столітя

Храм із села Великы Лучкы на Підкарпатьскій Руси перенесли до Прагы в році 1929, почас 1-ой Чехословацькой републікы, жебы став частьов збірок Народописного музея.

Будова зо шындльовов стріхов мала три турні. Храм быв збудованый в бойківскім штілі з елементами народного барока. В інтерьєрі были хосновавы тіпічны фарбы – біла, зелена і червена.

Церьков была комплетно розобрана, перенесена і пак знова поставлена до первістной подобы двараз. В році 1793 єй жытелі Великых Лучок продали векшому і богатшому селу – Медведівцям. Ку другому перенесіню дішло в році 1929, як вже было спомянуто. Святочне переданя храму жытелям Прагы одбыло ся 10-го септембра 1929-го року. На церемонії быв і ґубернатор Підкарпатьской Руси Антоній Бескид а жытелі Медведівців.

Жрідло фотоґрафії: iRozhlas.cz.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА