На поміч долині Вислокы. Сестры Рікы проти тамі в Мысцовій

В днах 4.-6. червця/юнія Колектив Сестры Рікы і Фундация Greenmind зорґанізували в Мысцовій, в серединній Лемковині, цикль пленеровых, артистично-активістичных подій, гепенінґів, выстав під гослом «Не вірте в резервуары! Наш дом єст над Вислоком! Мысцова, Поляны, Конты-Загорода».

Вшытко тото, жебы стрітити ся з тамтышніма мешканцями і побесідувати про плянувану будову тамы на Вислоці, про іх і того місця будучніст.

Хыжа перестане быти хыжом

«Хтіли сме наголоснити, што тама і штучне озеро Конты-Мысцова не охоронят нас перед сушами і выливами. То єст міт, котрым кормлят нас власти, выдаючы мілиярды на реґуляциі рік, през што нищат природу. Локализация того резервуару гев в Мысцовій нияк не спричынит, што Ясло буде безпечне перед выливами» – бесідує Цецилия Малік, артистка і активістка з Колективу Сестры Рікы.

Плянуване штучне озеро має быти зроблене в барз близкым сусідстві Маґурского Нацийонального Парку. Заляных буде веце як 100 хыж з парох сел, м.ін. з Мысцовой і Полян, переселеных буде парусот жытелів.

Як подают активісты – будова резервувару буде мала катастрофальны наслідства для неповторной природы того місця – зникнут такы ґатункы як рись, крикун, беркут, морозюк, оляпка, плишка гірска і вельо інчых.

Што ся діяло?

В пятницю, 4. червця/юнія, в Крампній прошли варштаты для діти. В суботу была прогулька по дні резервуару. Вєдно з провідником Славомиром Спрінґером з Маґурского Нацийонального Парку і жытелями Мысцовой перешли ся з Полян до Мысцовой вздолж Вислокы і МНП. Мож было захоплювати ся красом природы долины – єй дикістю, натуральністю, свободом. Сестры Рікы переоблечены были за Сторожкы Вислокы, на головах мали ручні роблены капелюхы-рыбы, в руках тотемы.

По полудни одбыл ся вернісаж выставы і гапенінґ Миколая Цішевского – артисты, котрый має в Мысцовій хыжу. «Выстава 333 м н.м. моя-твоя вказує неґативы з минулого, ожывлят вынятково кольоровый і цінный період мого жытя, коли вєдно з ґрупом моіх камаратів і несподіваном, але і неоціненом помочом жытелів Мысцовой повело ся нам сохранити послідню лемківску хыжу з ХІХ ст. по тій страні Вислокы» – оповідат Миколай Цішевскій, творця выставы і інсталяциі, котру вказано на наступный ден.

Балоны на высокости воды

Інсталяцию зробил Миколай Цішевскій з балонів выполненых гелийом i помістил єй в околицях костела і Дому Стражака в Мысцовій. Завісил іх на высокости будучого зеркала воды, так же каждый міг видіти, докале буде сігала вода, і міг сой уявити, што зникне заляне через воду.

В полудне, по літургіі, Сестры Рікы зорґанізували під Домом Стражака другє сніданя, на котре запросили жытелів Мысцовой. Бесідували про сенс будуваня тамы Конты-Мысцова, про незнану будучніст мешканців, іх хыж, маєтку, землі. Разом з малярком Анном Хмєль нарисували мапу, на котрій позначыли, де сут іх теперішні домы, поля, ліс, костел, цмонтір, склеп, де сут скарбы фауны і флоры – вшытко тото, што знинкне під водом.

На закінчыня вікендового гапенінґу прошло торжественне одкрытя капличкы з іконом Річной Богородиці, покровителькы Мысцовой, котру намалювала артистка з Ясла Марта Ямруґ.