Голосник

На русиньскім балі передали Орден Адолфа Добряньского

В суботу 22-го фебруара 2020-го року в кошыцькім готелі Double Tree by Hilton проходив ІІ. Репрезентачный бал Русинів, котрого головным орґанізатором є молодежна орґанізація молоды.Русины. Гостителями на балі были Петро Штефаняк, Маріянна Железна і Петро Мацко.

Цільом той події, котра по першім річнику в Пряшові перенесла ся до Кошыць, є вытворити простор на сполоченьску стрічу Русинів на репрезентачній уровни.

На бал пришли і цінны гості

ІІ. Репрезентачный бал Русинів святочно одкрыв міністер фінанцій Словацькой републікы Ладіслав Каменіцькый, котрый участным прозрадив, же сам має жену Русинку. Участныма на події были і уповномоченый влады Словацькой републікы про народностны меншыны Ласло Буковскый ці державный секретарь Міністерства обороны Словацькой републікы Марцел Салонь.

Русинів на бал пришли посмотрити і двоми єпіскопи. Владыка Мілан Хаутур, єпарха Кошыцькой ґрекокатолицькой єпархії в рамках одкрытя балу поздравив участных і заспівав многолітствіє. Вєдно з ним пришов і апостольскый адміністратор Кошыцькой ґрекокатолицькой єпархії владыка Кіріл Василь.

Богатый проґрам і передаваня ордену

Орґанізаторы приготовили на баловый вечур богатый проґрам. До танця грала Музика Мілана Рендоша – Рендошовці і ґрупа Ролланд з Чірча. В рамках проґраму выступив і популарный співак русиньскых співанок Штефан Штець, участным одпрезентовав ся і Фолклорный колектів Горнад з Кошыць. Цілым вечором проводив в позіції модератора Михал Ільканин.

В суботу в рамках балу проходило і історічно перше передаваня Ордену Адолфа Добряньского. Орден зрядив на своїм остатнім засіданю Округлый стіл Русинів Словеньска. Уділює ся фізічным і правницькым особам, котры заслужыли ся о розвиток народной ідентіты, обгайобу прав Русинів выходячіх з меджінародных документів і підниманя якости жывота Русинів на Словакії і в загранічу. Новозрядженый орден має пять клас і єдну окрему класу з коланом (ланцом ордену). ОСРС так хоче оціньовати заслугы на благо Русинів.

В кошыцях Орден Адолфа Добряньского 4-ой класы быв запожычаный Анні Кузмяковій за вызначный вклад до области розвитку русиньской пресы і културы, Орден Адолфа Добряньского 5-ой класы быв запожычаный Боґданови Ґамбальови за вызначный вклад до области русиньскых медій. Церемонію запожычаня проводив Мілан Піліп, канцеларь ордену і Петро Штефаняк, председа Округлого стола Русинів Словеньска.

Додаточно буде Орден Адолфа Добряньского 4-ой класы запожычаный Васильови Ябурови, котрый не міг взяти участь на балі. Ябур має дістати нагороду за вызначный вклад до области розвитку русиньского языка.

Автор фотоґрафій: Патрік Лабант.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА


Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі