На сітуацію з коронавірусом реаґують і міста в русиньскых реґіонах. Шыють маскы

Од понеділька 16-го марца 2020-го року суть на Словакії заперты вшыткы склепы окрім тых з потравинами, апатык і дроґерій. Влада в повязаню з наряджінями, жебы заборонити пошырьованю коронавірусу, заперла і граніці зо сусідніма державами а контролює їх, припадно їх контролюють словацькы сусіды.

Но жытелів найвеце трапить недостаток охранных средств. Іде передовшыткым о охранны маскы на тварь. І кедь словацька влада вже обїднала маскы в дакілько міліонах фалатків, маскы підуть головно до здравотницькых заряджінь. З недостатком того сортіменту ся так мусять самосправы – міста і села, вырівнати по свому. На сітуацію реаґують і міста в русиньскых реґіонах як Снина, Меджілабірці ці Свідник.

Снина шыла маскы як перша

Як перша на сітуацію зареаґовала Снина. Місто і посердницьтвом свойой пріматоркы Даніелы Ґаландовой вже 12-го марца інформовало, же містьскый подник зачав шыти охранны маскы, котрых є недостаток. В тім часі іщі ани не быв выголошный надзвычайный стан, но были уж прияти дакотры нардяджіня. Люди на обїднаны маскы, котры ся купують, могли чекати од віторка 17-го марца. Маскы собі треба было обїднавати в мінімалній кількости 10 фалатків.

В Снині ани робітници соціалной службы не зістали холодныма в повязаню зо сітуаційов коло корнавірусу. Про тых наймешных з вылученых комуніт жытельства ушыли безплатно дітячі охранны маскы. А свій вклад дала і сама пріматорка, котра через вікенд так само шыла охранны маскы.

Меджілабірці шыють на уряді

В намазі о охрану своїх робітників перед можливов інфікаційов новым коронавірусом зачав і Містьскый уряд в Меджілабірцях шыти охранны маскы на тварь. Ініціатіва самосправы має подля слов пріматора Владислава Вышньовского покрыти лем властны потребы, на высшу продукцію не мають капаціты, інформовала аґентура TASR.

„Радо бы сьме шыли і про жытелів, але не сьме на то технічно, ани матеріално забезпечены,“ повів пріматор з тым, же свойпомічна выроба масок є єдиным способом, як тоты охранны средства про своїх робітників забезпечіти.

Маскы про майже 100 робітників міста включно теренных соціалных робітників і містьскых поліцайтів шыють три робітничкы Містьского уряду. Денно зроблять коло 80 фалатків. Матеріал, котрый місто має, може ся хосновати на єдноразову маску, значіть мусять шыти все новы.

Пріматор аґентуру TASR інформовав, же подобным способом собі охранны средства забезпечують і остані жытелі міста.

Свідник маскы роздавать, наперед сеніорам

Місто Свідник в повязаню зо сітуаційов забезпечує охранны маскы про жытелів. Наперед їх од міста діставають найстаршы жытелі, котры суть найвеце різіковыма. Радніця такой зачала приготовльовати і простор про припадну госпіталізацію пасціентів або про людей в карантені.

„Маєме намагу нелем реаґовати на сітуацію, котра актуално існує, але і робити крокы допереду. Окрім предписаных наряджінь сьме прияли і далшы крокы над рамкы тых приятых,“ повіла про аґентуру TASR пріматорка міста Марцела Іванчова.

Подля їй слов вшыткы робітници Містьского уряду дістали охранны средства. Єдночасно свідницькы технічны службы дезінфікують в місті місця, котрых ся люди дотуляють. То значіть лавочкы, гріска про діти, вшыткы місця, з котрыма люди приходять до прямого контакту.

Од понеділька місто зачало роздвати охранны маскы. Тоты ішли женам, котры опікують людей і суть в терені, містьскым поліцайтам і теренным робітникам обще. І там окрім обїднаных масок мають і маскы, котры шыє містьскый подник. 500 масок мають роздати найстаршым жытелям.

Роздаваня піде подля віку. „Підеме од найстаршых ку наймолодшым жытелям. Значіть, зачнеме у 80-річных, 70-річных, пак подля кількости масок, котры ся нам актуално подарить забезпечіти, будеме продовжовати в дістрібуції масок і далше,“ додала пріматорка.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА