На Словакії списало ся 5,22 міліона людей. Пряшівскый край меджі найліпшыма

Почас електронічной і асістованой формы списованя жытелів на Словакії залучіло ся до цензусу 5,22 міліона людей. Цілкове чісло списаных представлює 92,7 процента з одгадованой кількости населіня.

На віторковій пресконференції о тім інформовали представителі Штатістічного уряду Словацькой републікы. Інформацію принесла аґентура TASR.

В електронічнім списованю, котре проходило од 15-го фебруара того року до 31-го марца, самосписало ся 4,84 міліона жытелів Словакії, што представлює 86 процент. В рамках асістованого списованя, яке зачало 3-го мая і закінчіло ся 13-го юна, прибыло далшых 376 тісяч списаных.

„Про нас тоты чісла суть успіхом, дякую каждому, хто ся списав,“ повів председа Штатістічного уряду Александер Баллек. Оцінив комунікацію з партнерами Списованя жытелів, домів і квартелів 2021, підняв самосправы за співпрацу коло списованя, але і інформованя з боку медій.

Пряшівскый край меджі найліпшыма

Ґенерална директора Секції соціалных штатістік і демоґрафії Штатістічного уряду Людмила Іванчікова інформовала, же найвеце списаных жытелів є із Жіліньского краю, де ся списало 94,6 процента людей.

Меджі три найуспішнішы краї в списованю належать і Баньскобыстріцькый а Пряшівскый, де ся в обидвох припадах списало 94 процент жытелів. „Баньскобыстріцькый і Пряшівскый край были вєдно з Кошыцькым крайом лідрами в асістованім списованю,“ додала Іванчікова.

Єдиным крайом, котрый має під 90 процент списаных людей, є Братіславскый край. В головнім місті ся списало 88,4 процента з одгадованой кількости жытелів. Збераня даных іщі не є закічене. Як пояснила Іванчікова, кедьже іде о інтеґроване списованя, в слідуючій фазі ся іщі буде робити з адміністратівныма джерелами даных, котрых мають штатісты єденадцять. По порівнаню і доповніню выйдуть фіналны чісла списованя.

Першы резултаты кінцьом року

Говоркыня Списованя жытелів, домів і квартелів 2021 Ясміна Штаудер інформовала, же почас списованя не зазначіли і не были голошены жадны рушывы обставины, ани міморядны сітуації.

Представителі Штатістічного уряду потвердили, же на кінцю того року бы мали публіковати першы аналізы списованя, котры дотулюять ся здобытых демоґрафічных, соціалных і културно-общественных інформацій.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА