На святкованя річніці Карпато-дукляньской операції піде майже міліон евр

Міністерство обороны Словацькой републікы планує на 6-го октобра 2024-го року святкованя 80-ой річніці Карпато-дукляньской операції, котры шторік проходять на Дуклі і в Свіднику. В рамках святковань має одпрезентовати ся воєньскый музей, котрый є у Свіднику, і авіаційна техніка Озброєных сил Словацькой републікы.

Як выходить з владного матеріалу, на святкованя піде тот рік майже міліон евр. Словацька влада тот документ схвалила в середу 25-го септембра, інформує аґентура TASR. Точна сума, яка піде на святкованя річніці, є 974 тісяч евр. 22 тісяч евр із приділеных на святкованя фінанцій має дістати прямо місто Свідник.

Карпато-дукляньска операція была найвекшов і найкырвавішов битвов лінії выходного фронту, котра є повязана з теріторійов днешньой Словакії.

Войска Червеной армії і Першого чехословацького армадного корпусу під веджіньом ґенерала Людвіка Свободы почас ньой вели тверды бої з німецькым войском. Офензівна операція, котра мала споїти повстанецькы силы Словацького народного повстаня із совітьскыма войсками, тырвала од 8-го септембра до 28-го октобра 1944-го року.

6-ый октобер є на Словакії День героїв Карпато-дукляньской операції, записаный в календарі як памятный день. В тот день ся Першому чехословацькому армадному корпусу подарило перекрочіти по тяжкых боя через Дукляньскый перевал чехословацькы граніці.

Фото: Марош Черный/TASR.