На вежу церкви в Рудній вернул зыґар

По двох роках на вежу православной церкви Воздвижыня Честного Креста в Рудній (нижньошлезскє воєвідство) вернул зыґар. По модернізациі зас царює над тым понімецкым місточком, котре по 1947 р. приняло выселеных Лемків.

Православна парохія в Рудній была основана як єдна з першых на західніх землях, хоц офіцияльно аж пят років по акциі «Вісла». Вірны заняли єден з найстаршых храмів в oколиці.

Найвысшый пункт

Вежа православной церкви в Рудній то тіж найвысшый пункт в місцевости. Видно ю такой з каждого боку. Прото зыґар, котрый колиси был основный для жытелів такого міста, бо вказувал вшыткым час, тепер зас вернул на своє місце.

Церковный зыґар, міцно піднищеный, діждал ся вкінци модернізациі. Зробил ю прецизийні специялиста в обшыри консервациі рухомых памятників з Пущыкова під Познаньом. Його направа коштувала 95 тис. зл. Фінансову підпору парохіі дала Ґміна Рудна та державна компанія КҐГМ Польска Мід. «Тішу ся, што наш памятковый зыґар зас ходит. Не было бы то можливе без фінансовой підпоры Ґміны Рудна, за што сердечно дякую пану війтови і пану секретарьови. Споміг нас тіж КҐГМ, за што сме вдячны, і очывидно вірны. Сердечне Боже заплат. Дякую тіж працівникам Уряду Ґміны за мериторичну поміч», повіл про порталь www.naszemiasto.pl настоятель, о. митр. Дарий Цьолка.

Церковный зыґар был ремонтуваный уж перше, бо в 80. роках ХХ ст. Товдышня модернізация проходила попри роботах забезпечаючых церковну вежу, в якы заанґажуваны были парохіяне, а головно єден з них, Теофіль Дрозьдзяк, родак з Боґушы.

Храм Лемків

Першы запискы про костел в Рудній являют ся уж в 1366 році. Теперішній вознесеный был в роках 1474-1500, а в XVI столітю добудувано од заходу вежу, на котрій поміщены сут годины. Костел перше хоснували як святыню євангелисты, пак католикы, а од недавна (в однесіню до другых) – православны вірны.

В рамках акциі «Вісла», в 1947 році Лемків оселено м.ін. в Рудній і околичных селах. Доднес то єдно з найвекшых скуписк лемківской меншыны в Польщы. Подля даных з повселюдного спису з 2011 рока близко 800 жытелів Ґміны Рудна приналежыт до лемківской етнічной меншыны (в цілій Польщы то кус більше як 10 тис., а в самым нижньошлезскым воєвідстві 5 тис.).

Офіцияльно православну парохію Возвиджыня Честного Креста основано в 1952 р. Вірныма од початку были выселены Русины. Были то жытелі такых сел як Боґуша, Чарна, Королева Руска, Ганчова, Устя Рускє, Брунары, Лабова ци Ждыня. Парохіяне были розметаны по околичных селах – на Высокій, в Млечу, Ринарціцах, Тошовицях, Юговицях, Ґвізданові, Малых і Велькых Ґавронах, Клішові, Бродловицях, Байкові, Хобєні і інчых. Парохія, за даныма з 2014 р. рахувала 200 вірных.