На видоковых вежах в Чорноріках і на Церговій заінсталювали новы атракциі

Пляншы з фотоґрафічном панорамом Карпат і люнета до обсервациі – то новы атракциі поміщены з думком о туристах, якы хотят захоплювати ся видоками з веж в Чорноріках і Церговій.

З видоковой вежы в Чорноріках розтігат ся єдна з найшыршых в польскых горах панорам: од Татер через Низкій Бескід по Бєщады. Туристы не мусят уж згадувати, якы верхы видно довкола, можут схоснувати практичне опрацуваня, котре все доступне є на плятформі. Сут то великы інформацийны таблиці, на котрых помістили фотоґрафічну панораму Карпат з описами – названями гір, іх высокістю і орієнтацийном одлеглістю од вежы. Автором знимок, што сут підкладом панорами, єст Лукаш Обух, корчыньскій фотоґраф, котрый веде фанпейдж «Корчына – Туристика і далекы обсервациі».

При одповідній погоді з Чорнорік видно тіж Татры і Бєщады. Як подає фотоґраф, найвысшы горы в Польщы найбарже любит фотоґрафувати свитаньом, а найкрасшый видок на Бєщады єст пополудньом, коли сонце освітлят іх верхы. Ближе як Татры ци Бєщады видно з вежы Низкій Бескід, а на сході мож достеречы і Высокы Бєщады – єдине в Польщы пасмо Східніх Карпат, та Саноцко-Турчаньскы Горы, тіж тоты по украіньскій страні.

Окрем видоків на туристів, якы приізджают на вежу до Чорнорік, жде выстава фотоґрафій Томаша Оконєвского. Є тіж місце для реляксу. Вступне на вежу дармо. До 31. жолтня/октобра войти мож в год. 8.00-20.00, а поза сезоном (медже 1. листопада/новембра а 31. марця) до 17.00 год.

Люнета на Церговій

Емоциі ждут і на туристів, якы дойдут на верх Церговой. На видоковій вежы замонтували панорамічну люнету, котру мож хоснувати дармо. Ґміна купила єй в рамках реализациі польско-словацкого проєкту «Дукля-Свидник 360 градусів». Вежа на Церговій доступна є цілый рік.

Фот. korczyna.pl