На юбілей архієпіскопа Кіріла Василя зышли ся єпіскопи з веце держав

Як інформовав Пресовый центер Кошыцькой єпархії, в середу 7-го мая 2025-го року в кошыцькім Катедралнім соборі Рождества Пресвятой Богородіці одбыло ся торжество.

Высокопреосвященый архієпіскоп Кіріл Василь – кошыцькый єпарха, при нагоді свого недавного юбілея – 60-ох років, стрітив ся із братами в єпіскопскій службі, представителями монашества і веце вызначныма особностями церьковного жывота.

На торжественну літурґію пришов і апостольскый нунцій на Словакії Нікола Джірасолі ці председа Конференції єпіскопів Словакії і кошыцькый римокатолицькый архієпіскоп і митрополіта Бернард Бобер.

Із ґрекокатолицькых єпіскопів на Словакії учатсь взяли Высокопреосвященый Йона Максим – пряшівскый архієпіскоп і митрополіта, Преосвященый владыка Петро Руснак – братіславскый єпарха, котрый мав і проповідь, далше Преосвященый владыка Мілан Лах – помічный єпіскоп Братіславской єпрхії, і емерітный кошыцькый єпарха – кір Мілан Хаутур.

Участь взяв на торжестві і Преосвященый владыка Теодор Мацапула – мукачовскый єпарха. До Кошыць пришли і вшыткы єпіскопи Ґрекокатолицькой митрополітній церькви в  Мадярьску, Высокопреосвященый Філіп Кочіш – архієпіскоп і митрополіта гадудороґскый, Преосвященый Атаназ Орос – єпарха мішколцьскый, і Преосвященый Авел Сочка – єпарха ніредьгазьскый.

Із Польщі пришов Высокопреосвященый Євгеній Мірослав Поповіч – архієпіскоп і митрополіта перемышельско-варшавскый Україньской ґрекокатолицькой церькви.

Участны были і далшы словацькы римокатолицькы єпіскопи. Заґратуловати кошыцькому єпархови ку юбілею пришли і дішстріктуалный єпіскоп Выходного діштрікту Євангелицькой церькви авґсбурзьского віроісповіданя  Петер Мігоч, а Высокопреосвященый Ґеорґій – архієпіскоп михалівско-кошыцькый Православной церькви в чеськых землях і на Словакії.

Торжественну архієрейску літурґію співом допроводив хор богословів із пряшівской семінарії під веджіньом отця Томаша Пецуха.