Над Климківком другій етап модернізациі берегів

Над штучным заливом в місци первістного села Климківка власні зачал ся другій етап робіт повязаных з заґаздуваньом берегів озера. Такы діяня сут можливы завдякы підписаню через ґміну Ропа умовы на тоту ціль.

Першый етап проєкту был реалізуваный протягом минулого рока. Роботы были одобраны осіню. Тепер власти ґміны Ропа рыхтуют ся до другой великой інвестициі в обшыри резервуару. 

Веце стежок і місц для туристів

Попередній етап обнял м.ін. реґуляцию і профілюваня берегів озера. На долгости 145 метрів побудуваны были специяльны бетоновы берегы, з котрых спущены будут сходы, якыма туристы зыйдут аж до самой воды. Берег має быти безпечный і тырвалый.

Другій етап як раз стартує тепер. В рамках робіт буде побудувана 350-метрова біциґльова стежка. Буде тіж побудуваных 15 компактных пляж, сходы до озера, помосты і місця на затриманя свого водного ґратя. Ціла обшыр буде освітлена. Будут і місця на ґрілюваня, де побудуют специяльны альтаны.

Задашена обшыр до ґрілюваня буде старчаючо велика, жебы приняти вшыткых туристів. Має мати 91 квадратных метрів, будут гын і санітарияты, доступ до біжучой воды. Попри побудуют паркінґ та великє стережене місце, де можна буде ся купати. Вшыткы обєкты будут достосуваны до потреб осіб з дисфункциями.

Спілпраца сусідів

Інвестиция то великій проєкт, котрый єст веденый при спілпрацы трьох сусідніх ґмін – Ропа, Устя Рускє і Санкова.

Завершыня робіт передвиджене єст на вересен/септембер 2020 рока. Вартіст другого етапу проєкту то ок. 1,5 мілийона зл.

Вшыткы інвестициі будут реалізуваны в єдным часі, жебы наконец творити ціліст. Так вшыткы три ґміны будут діяти подля єдного пляну, якій змінит климківскє озеро. Санкова выконат роботы, якы получат Климківку з Маластівском Маґуром. На тым пути збудуют дальшу біциґльову трасу. Буде тіж біциґльова стежка з Климківкы до Устя. Цілю інвестиций єст збільшыти атракцийніст реґіону, што в добі пандеміі може заохотити туристів з Польщы до вакаций в краю, а не за границьом.