До кінця спису лем пару дни. Надале не списало ся близко 20% жытелів

Уж такой конец, а надале не списало ся 20% жытелів Польщы. Припоминаме, што іщы лем до кінця вересня/септембра 2021 р. тырват в Польщы Нацийональне Повселюдне Списуваня.

Заохочаме приступити до спису, кєд же єст то не лем наше право, але і громадяньскій обовязок. Несписаня ся в вызначеным часі горозит фінансовым покараньом.

Пята част жытелів Польщы звлікат

Нацийональне Повселюдне Списуваня в Польщы выстартувало початком квітня/апріля 2021 р. Дотля списало ся 80% управненых жытелів, но решта надале не выполнила того обовязку.

Обовязок списати ся має каждый, хто постійні або часово прожыват на обшыри Польщы. Од початку списуваня проходит головно в інтернетовій формі, але мож ся тіж списати при помочы рахмайстрів.

Як подают рахункы Головного Статистичного Уряду, надале 20% жытелів не приступило до жадной з форм спису. Пляново – як інформували урядникы – кєд сме не зробили інтернетового самоспису, мали до нас дзвонити рахмайстове. Тото, же до той поры не списала ся такой пята част жытелів Польщы, значыт правдоподібно, же з телефонами од урядників єст проблем.

Найгрірше в великых осередках

Згідні з досліджынями Головного Статистичного Уряду, найліпше зо списом порадили собі жытелі Опольщыны і підкарпатского воєвідства, де уж списало ся 90% управненых. Найгірше є на Мазовшы, а і гын, де сут великы осередкы. В самій Варшаві статистикы так само не сут найліпшы.

Подібні єст на Нижнім Шлеску і в Малопольщы, де збераня списовых даных іде барз помалы. Уряд інформує, што списуваня проходит найліпше в сельскых ґмінах і невеликых місточках.

Майте позір

Несписаня ся горозит покараньом до 5 тис. зл, зас поданя неправдивых інформаций фінансовым покараньом або каром ограничыня свободы.

Хоц спис ся не закінчыл, то як інформує Головный Статистичный Уряд, дотля до польскых судів трафило уж більше як сто внесків о покараня осіб, якы одмовили участи в списі.

Вшыткы переданы в списі даны сут обняты статистичном таємницьом і сут анонімовы. Дакотры з чысел зобраных вчас тогорічного списуваня сут особливо важны для лемківской меншыны. Мож в ним м.ін. окрислити свою нацийональніст і хоснуваный язык, в тым окрему лемківску нацийональніст і лемківскій язык.