Голосник

Найрусиньскішый окрес на Словакії зіставать єдиный без коронавірусу

Окрес Меджілабірці має дакілько най. Є подля середнього віку жытелів найстаршым в рамках Пряшівского самосправного краю і найменшын, што до кількости жытелів, в рамках цілой Словакії.

В окресі ся голосить за остатнім переписом населіня із 2011-го року понад 60 процент населіня ку русиньскій народностній меншыні, і так є найрусиньскішым окресом на Словакії. Што моментално найвеце тішыть, окрес Меджілабірці, станом ку 14-му маю 2020-го року, не мав ани єден припад інфікації новым тіпом коронавірусу. Зіставать посліднім, єдиным окресом в рамках Словакії, де пандемія не пришла.

Як повіли компетентны про денник Korzár іщі 6-го мая, не є то дослідок слабой міґрації за роботов ці низкой кількости тестованых.

Превентіва є пріорітов

Пріматор міста Владислав Вышньовскый про денник повів, же ся сітуації тішать. За його словами подяка належыть вшыткым жытелям, котры одповідно дотримують строгы превентівны рештрікції.

„Превентівна діялность є про нас барз важнов, роблять і дотримують єй вшыткы орґанізації в місті. Всядыль суть дезінфекчны препараты, люди слухняно носять охранны маскы, дакотры і рукавиці,“ підкреслив пріматор, котрого цітовав денник-

Міґрація є за його словами єднака як і в іншах частях Словакії. Люди, котры робили в загранічу, ся вертали і до окресу Меджілабірці, но нащастя нихто не пришов інфікованый. В місті тестовали і різіковы марґіналізованы ґрупы жытелів.

„Проценто тестованя в окресі є порівнательне з остатніма окресами,“ повіла Ленка Леснякова з Реґіоналного уряду здравотництва в Гуменнім. „Звычайно тестуєме людей з підозріньом на хвороту, так само і марґіналізованы ґрупы, з неґатівным резултатом.“

Строгы наряджіня в окресі не увольнюють, додав пріматор, і роблять вшытко так, жебы ани теоретічно не могло дійти ку тому, жебы ся новый коронавірус пошырьовав. Думать, же полявити в наряджінях бы была велика хыба. Окрес комунікує і зо старостами сел, подавають їм інформації о наряджінях і рештрікціях. І на Окреснім уряді ся згоднуть з містом, же абсенцію хвороты в окресі мож приписати одповідному приступу жытелів.

Маленьскый окрес

В місті Меджілабірці за даныма із 2019-го року жыє 6531 жытелів, в цілім окресі є їх 11 787, што є найменше в рамках цілой Словакії. Середній вік населіня окресу є 42,75 років, чім ся Меджілабірці стали найстаршым окресом Пряшівского самосправного краю.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі