Наталія Чагойова стала лавреатков Духновічового Пряшова 2025

В понедільок 9-го юна 2025-го року святкованя Дня Русинів Словакії продовжовали 24-ым річником Духновічового Пряшова – конкурзу в декламації поезії, прозы, народного розповіданя, властной творчости і малых сценічных форм.

Духновічів Пряшів, котрый шторік орґанізує Русиньска оброда на Словеньску, то досправдове свято русиньского языка. І тот рік фінале конкурзу, котре опередять окресны конкурзы, проходило в Театрі Александра Духновіча в Пряшові, на нашій професіоналній сцені.

Зачало ся при памятнику Духновіча

Тот рік Духновічів Пряшів почав при памятнику будителя, по котрім має конкурз і назву. Там рано зышли ся діти із своїма педаґоґами. Ґрекокатолицькы священици із Общества святого Йоана Крестителя, отець Мілан Ясик і отець Франтішек Крайняк, одслужыли на тім місці панахіду за Александра Духновіча, але і за вшыткых русиньскых предків, котры уж суть на вічности.

Отець Мілан Ясик, председа общества, мав і куртый приговор, а на кінцю пєтной події коло памятника поінформовав, же общество приготовило про кажду школу, котра має в тот день на конкурзі своїх школярів ці штудентів, безплатно в рамику портрет Духновіча, котрый собі можуть взяти.

Так священици із общества наповняють свою думку, жебы на каждій школі в русиньскім реґіоні быв і портрет нашого будителя.

Конкурз одкрыв председа РОС

По панахіді, котра была по церьковнославяньскы з русиньскыма частями, уж участници одышли до Театру Александра Духновіча. По русиньскій гімні вшыткых привітав член драматічного колектіву нашого театру – актор Володимір Рогач. Тот діти і позабавляв у часі перервы, кедь жюрі вырішовала о резултатах конкурзу.

Рогач припомянув, же тот рік є Духновічів Пряшів вынятковый в тім, же святкуєме Рік русиньского языка – 30-ый юбілей од кодіфікації. Подяковав вшыткым, котры дали вклад до того діла, до кодіфікації але і далшого розвитку нашого языка. Так само припомянув, же лем пару днів назад вмер єден із двох головных кодіфікаторів – Василь Ябур, і попросив участных о минуту тиха.

По одданю чести Васильови Ябурови пожадав председу Русиньской оброды на Словеньску – Мартіна Караша, жебы офіціално одкрыв тогорічный Духновічів Пряшів 2025.

Пак вже представив жюрі, котра тот рік была в складі: Михал Павліч – науковый робітник Інштітуту русиньского языка і културы Пряшівской універзіты в Пряшові із шпеціалізаційов на русиньску літературу як председа жюрі, і членове Маріян Марко – директор ТАД, Іґор Латта – довгорічный бывшый актор ТАД, Наталія Гребікова – редакторка русиньской радіовой редакції Народностно-етнічного высыланя Радія Патрія – Словацькой телевізії і радія в Кошыцях, i Домініка Новота – докторандка Інштітуту русиньского языка і културы Пряшівской універзіты, котра своє баданя присвятила русиньскій літературі.

По представліню тогорічной жюрі вже могло перейти ся ку окремым выступліням змагаючіх ся на Духновічовім Пряшові 2025.

Лавреатков стала Наталія Чагойова

Змагаючі ся были розділены у віковых катеґоріях 0 аж 5, і віковы катеґорії были пак розділены на жанры – поезія, духовна декламація, проза, народне розповіданя, властна творчость і малы сценічны формы. На фінале конкурзу до Пряшова поступили лем тоты, котры в окремых катеґоріях на окресных конкурзах были на першім місці.

Реґіоналны конкурзы тот рік были в Бардейові, Старій Любовні, Снині, Hуменнім, Свіднику, Меджілабірцях, участників конкурз мав і з Пряшова а Баньской Быстріці, де поступовы конкурзы не были.

Довєдна тот рік на Духновічовім Пряшові выступило 99 змагаючіх ся, што знова потвердило, же о русиньске літературне слово, о його декламацію, о творіня по русиньскы, граня по русиньскы, є інтерес. Жюрі собі посмотрила і выслухала множество выступлінь в різных жанрах. І мала што робити, жебы в окремых катеґоріях уділила за выступліня найліпшы місця.

Лавреатков Духновічого Пряшова 2025 стала штудентка Ґімназії св. Йоана Залтоустого в Гуменнім Наталія Чагойова. Наталка довгы рокы ходить на Духновічів Пряшів, все была меджі найліпшыма, і порота оцінила і тот рік їй выняткове выконаня, як і то, же продовжує в декламації.

Подякованя орґанізаторів

За головного орґанізатора – Русиньску оброду на Словеньску, дякуєме вшыткым, котры дали свій вклад до далшого Духновічового Пряшова. Oрґанізаторам окресных конкурзів, членам жюрі в містных конкурзах і в Пряшові, педаґоґам, котры роблять з нашыма дітми, родічам, котры дали свої діти педаґоґам, жебы могли розвивати ся в русиньскім языку.

Велике множество дітей перешло містныма конкурзами, і так Духновічів Пряшів росне, розвивать ся, є все якостнішый.

Подякованя належыть і Міністерству школства, баданя, вывоя і молодежи Словацькой републікы як выголошовательови конкурзу, а Фонду на підпору културы народностных меншын, котрый тоту подію підпорив із публічных средств. Уж теперь ся тішыме на юбілейный – 25-ый Духновічів Пряшів у 2026-ім році.

РЕЗУЛТАТЫ ДУХНОВІЧОВОГО ПРЯШОВА 2025

КАТЕҐОРІЯ 0

Поезія

1. Кароліна Марковічова – МШ Татраньска, Стара Любовня
2. Дорота Мачушова – Споєна школа, Свідник
3. Анна Дівішова – ОШ з МШ А. Духновіча, Влыч

Духовна декламація

1. Томаш Югас – Споєна школа, Свідник
2. Нела Крайнякова – ОШ Духновічова, Меджілабірці

Проза

1. Андреас Яніч – Споєна школа, Свідник
2. Нелка Василенкова – ОШ Пуґачевова, Гуменне
3. Барбора Матурканічова – ОШ Духновічова, Меджілабірці

КАТЕҐОРІЯ 1

Поезія

1. Михаела Сімчискова – Споєна школа, Свідник
2. Матєй Марушін – ОШ П. О. Гвієздослава, Снина
3. Ян Балберчак – ОШ Духновічова, Меджілабірці

Духовна декламація

1. Анна Гнидякова – ОШ Духновічова, Меджілабірці
2. Карін Гошкова – Споєна школа, Свідник

Проза

1. Моймір Русинко – ОШ А. Павловіча, Свідник
2. Максiміліан Гнат – ОШ Гырнчіярьска, Гуменне
3. Валентіна Цінова – ОШ Духновічова, Меджілабірці

Малы сценічны формы

1. ОШ Радвань над Лабірцьом – Патрік Ясик, Анна Мурайова, Николай Схірта
2. Споєна школа Свідник – Ема Мандульова, Яна Тычова, Юлія Зелізнякова, Вікторія Гріжова, Тамара Пухірова, Ела Малиновска
3. ОШ з МШ Кална Розтока – Іван Федоряк, Тімеа Байзова

КАТЕҐОРІЯ 2

Поезія

1. Мартін Коваль – Споєна школа, Свідник
2. Себастіан Ян Макара – ОШ Дарґовскых героїв, Гуменне
3. Леа Ковальова – ОШ з МШ А. Духновіча, Влыч

Духовна декламація

1. Віктор Бейда – ОШ Духновічова, Меджілабірці
2. Маріяма Фецканічова – ОШ Духновічова, Меджілабірці

Проза

1. Юліяна Карашова – ОШ з МШ Камюнка
2. Амалія Латтова – ОШ, Баньска Быстріця
3. Сандра Масіова – ОШ Духновічова, Меджілабірці i Наталія Томечкова – ОШ під Вінбарґом, Бардейов

Властна творчость

Діплом за участь: Лукаш Югас – Споєна школа, Свідник

Малы сценічны формы

1. ОШ А. Павловіча, Свідник – Тімеа Ганушінова, Діяна Яхімовічова, Наталія Маґулакова, Шімон Мунка, Себастіан Маркус Скалка, Адам Деметер Тупый, Емма Вархоликова
2. Кечера – ОШ з МШ Якубяны – Бенъямін Дуфала, Вікторя Князовицька, Штефан Рыдзік, Домініка Катренічова
3. ОШ з МШ Убля – Сандра Штеньова, Олівія Білецова, Матєй Дарянин, Маріяна Ріґанова, Лівія Василенкова

КАТЕҐОРІЯ 3

Поезія

1. Марія Маґдалена Черевкова – ОШ Духновічова, Меджілабірці
2. Ванеса Паліґова – Споєна школа, Свідник
3. Матєй Вайда – ОШ з МШ Кленова

Духовна декламація

1. Нела Ґебріянова – ОШ з МШ Кленова
2. Катарина Іванчова – Споєна школа, Свідник
3. Анна Панчакова – ОШ Радвань над Лабірцьом

Проза

1. Ліяна Родакова – Споєна школа, Свідник
2. Павла Росічова – ОШ з МШ Стащін

Властна творчость

Діплом за участь: Домініка Гакунова – Споєна школа, Свідник

Малы сценічны формы

1. ОШ з МШ Кленова – Матєй Вайда, Наталія Клепцьова, Нела Ґебріянова, Карін Ганчакова, Михаела Лабодзіньска, Емма Ковалчікова
2. ОШ з МШ А. Духновіча, Влыч Емма Бобрикова, Ребека Рунянинова, Йосиф Чурга
3. Кечера – ОШ з МШ Якубяны – Карін Гаястекова, Ема Ґрайзінґерова, Вікторія Липовска, Адріяна Худікова, Меланія Рыбовічова, Міріям Секельска, Каміл Дворщак

КАТЕҐОРІЯ 4

Поезія

1. Наталія Чагойова – Ґімназія св. Йоана Златоустого, Гуменне

Проза

1. Анна Гавриллова – Середня фахова школа педаґоґічна, Пряшів
2. Вікторія Шантова – Ґімназія св. Йоана Златоустого, Гуменне

Народне розповіданя

1. Самуел Прибиш – Споєна школа, Стара Любовня

Малы сценічны формы

1. Ґімназія Дукляньскых героїв, Свідник – К. Бохновічова, Е. С. Фецушова, П. Дримак, І. Копчова, М. Семанчік

КАТЕҐОРІЯ 5

Поезія

Діплом за участь: Гелена Хованцьова

ЛАВРЕАТ ДУХНОВІЧОВОГО ПРЯШОВА 2025

Наталія Чагойова – Ґімназія св. Йоана Златоустого, Гуменне