Нацийональны меншыны хотят єднакы права в цілым Европейскым Союзі

Представникы нацийональных меншын держав Евросоюза апелюют до ЕС, жебы зміцнил охорону членів нацийональных меншын і підтримувал языкову ріжнорідніст в Союзі.

В Польщы та в інчых державах, што сут членами Европейской Уніі, зберат ся підписы під Европейском Громадяньском Ініциятивом Minority SafePack. Є то перша в істориі ініциятива тыкаюча нацийональных і етнічных меншын, яка была зареґіструвана Европейском Комісийом. Нацийональны і етнічны меншыны Европы хотят, жебы ЕК створила єднакы правны акты спільны для вшыткых унійных держав. Тоты записы мали бы помочы хоронити правa нацийональных і етнічных меншын та підтримувати розвиток европейской культуровой спадковины при пошануваню культуровой і языковой ріжнорідности Европы. Права більшости не были бы при тым нияк ограничены.

Жебы могло так быти, треба зобрати милийон підписів в што найменше семох державах ЕС. Підписы збераны будут до квітня будучого рока, а в Польщы до кінця того рока (потрібных єст што найменше 38,5 тис. підписів). Ініциятиву координує на обшыри цілого EC Федеральна Унія Европейскых Наций (анґ. Federal Union of European Nationalities). ФУЕН зосереджат близко 90 членьскых орґанізаций, єст участником Рады Европы і консультацийным дорадцьом при ОЗН.

Дотепер ціла політика про нацийональны меншыны є в руках поєдных членьскых держав, неє ниякых европейскых стандардів іх реалізациі. Подля думкодавців ініциятивы Minority SafePack спійне европейскє законодавство мало бы обнимати:

• рекомендациі ЕС в справі охороны і підтримуваня культуровой і языковой ріжнорідности в Союзі (в тым розвитку меншынового шкільництва),
• допасуваня допомагаючых проґрамів так, жебы злегшыти доступ до них малым реґіональным та меншыновым языкам, 
• основаня Центру Языковой Ріжнорідности,
• основаня реґіональных помочовых середків,
• піднятя досліджынь тыкаючых хосенного влияня меншын на соспільний і економічний розвиток Европы,
• рівне трактуваня бездержавных меншын,
• стровіня єдного внутрішнього рынку для авторскых прав, зміны в справі медияльных услуг,
• вызначыня стандардів для реґіональных (державных) проґрамів підтримкы.

Подля думкодавців рекомендациі ЕК винны обнимати розвязаня, якы протидіяли бы загыбаню языків і культур. В списку пропозиций нашли ся такы, котры служат языковій ріжнорідности, особливі дают можніст хоснуваня реґіональных і меншыновых языків в публичным просторі. Звернено увагу, што потенциял меншын до зміцняня економічной, соспільной і територияльной спійности ЕС не єст старчаючо хоснуваний. Пропонуваны помочовы середкы мали бы быти проявом узнаня для значыня нацийональных меншын і ролі, яку має культурова і языкова ріжнорідніст. Ідея єст така, жебы уніфікувати права до едукациі нацийональных меншын, жебы в каждій державі были такы самы, так само реґулюваны і перестеріганы.

В Европейскій Уніі приналежніст до меншын (нацийональных, етнічных ци языковых) деклярує близко 50 млн люди. В Польщы меншыны становлят близко 1 процент громадян. Устава з 2005 рока про нацийональны і етнічны меншыны та про реґіональний язык вымінят девят нацийональных меншын (німецку, украіньску, жыдівску, білоруску, литовску, чешску, ормяньску, росийску та словацку) та штырі етнічны (лемківксу, караімску, ромску і татарску).

Підписати під ініциятивом мож ся за тым мотузком.