«Най церковний вітер грат…» в Саноку

В найблизший четвер, 25. серпня/авґуста т.р., Історичний Музей в Саноку просит на вернісаж выставы присвяченій сакральній штуці деревяных церкви. Подія зачне ся од 17.00 год. в Ґобеліновій сали в підземлях саноцкого граду і буде гын доступна до 25. вересня/септембра т.р.

Проєкт «Най церковний вітер грат» тішыт ся штораз більшом популярністю в ріжных частях Польщы. Быти може зато, же выстава вказує фотоґрафіі і православных, і грекокатолицкых церкви з ріжных реґіонів польской державы. Серед них находит ся тіж Лемковина. Выстава орґанізувана є в рамках циклю «Церковны оповісти» – має тішыти не лем око красныма знимками, але тіж збогатити внутрішні пережытя зо стрічы з Деревяныма Панями.

Знимкы роблено вчас вандрівок по Розточы, Бєщадах і Підляшу, та Низкым і Сандецкым Бескідах – значыт етнічній Лемковині. Авторы в своіх репортажах старают ся представити тоты радістны як і смутны хвилі з жытя церкви, называючы іх жытьом і смертю храмів – зачынаючы од высвячыня, по штоденны богослужыня, аж до хвилі, коли в декотрых реґіонах Польщы ріжны обставины не были для святынь найліпшы – были розобраны, розшабруваны, знищены. Орґанізаторы мают замірене, жебы выставі товаришыло задуманя нам минулым, теперішністю і будучым Деревяных Пань, котры часто попадают в руіну і ідут в непамят, але тіж – дякуючы стараням ріжных реліґійных спільнот – часто наново розквитают.