Не буде в Злоцкым ізды на лыжах під задашыньом

Задашены схылы до ізды на лыжах мали притігати туристів і выпромувати Мушыну і єй околиці серед любителів зимовых спортів. Вшытко вказує на тото, што задашеного схылу на Лемковині не буде. Реґіональна Дирекция Охороны Середовиска уж вчас рыхтуваня студиюм ствердила, што не мож зробити такого схылу з огляду на ендемічну траву, котра порастат тамты лукы.

Тема будовы задашеного схылу першыраз явила ся іщы в 2013 р. Товды то бургомайстер Мушыны Ян Ґольба звенрул ся до маршалка, жебы вписати ініциятиву на список реґіональных проєктів на рокы 2013-2020.

Задашеный схыл мал находити ся на пограничы двох сел – Злоцкого і Астрябика. Плянувано там будову трас, готелів і получыня терену з лыжныма атракциями на Креницкій Яворині. Необхідном была до того позитивна опінія Реґіональной Дирекциі Охороны Середовиска.

Задашеного схылу радше не буде

Охочых побудувати інвестицию не бракувало. Справу затримала Реґіональна Дирекция Охороны Середовиска, котра рішыла, што будова обєкту загорозит волкам і медведям. Воєвідскій Адміністрацийный Суд одкликал некорыстне для Мушыны рішыня, але ґенеральный директор охороны середивиска продолжыл спротив і зложыл касацийну скаргу. Долгы судовы процесы спричынили, што заграничны інвесторы (з Нідерляндів, Росиі, Украіны, Словациі) і інвесторы з Польщы стратили терпеливіст і не повело ся зреализувати проєкту. В тамтым часі інвестиция мала бы вартати коло 120 млн зл.

Тема вернула зас два рокы тому і спочатку здавало ся, же вкінци інвестиция рушыт до переду. На жаль, вшытко вказує на тото, же і тепер ся не поведе. Як подал бургомайстер Мушыны Ян Ґольба – Ґенеральна Дирекция Охороны Середовиска рішыла, што лыжный схыл не може ся там находити, кєд же на луках росне ендемічна трава.

За бургомайстом Ґольбом – то не перша інвестиция в ґміні, котрой не даст ся зреализувати зо взгляду на безвзглядны процедуры в державі. Подібні єст з ґондольовом колейком на гору Мальник.

Вежа єст, на колейку треба ждати

В 2020 році бургомайстер Мушыны піддал під соспільны консультациі думку побудувати гын видокову вежу і ґондольову колейку. Ініциятивы стрітили ся з ентизиязмом туристів і мешканців. Єдну повело ся зреализувати – вежа уж стоіт і є популярным обєктом. Реализация другой продолжат ся в часі.

Плянували, што долгіст колейкы в Мушыні буде мала 1700 м. На трасі курсували бы 2-3 шкляны ваґоникы гідны помістити до 8 осіб. І в тым примірі Реґіональна Дирекция Охороны Середовиска застопувала інвестицию. Причыном была локализация стопів-підпертя, а конкретно єдного з них – находит ся на обшыри «Натура», а то зобовязує зробити рапорт влияня на середовиско.

Выконаня рапорту занимат коло рока, пак найпевнійше два рокы треба ждати на позволіня. Кошт рапорту то коло 200 тис. зл.

Родинны забавы, біциґлі під небом

На яр закінчыт ся будова Родинного Парку Рекреациі «Башта» в Мушыні. Інвестиция буде коштувала веце як 9,4 млн зл. Парк находит ся над потоком Щавник. На тепер то іщы пляц будовы, але уж більш-менш видно, де што буде. А будут то м.ін. ґратя і пляцы до забавы і рекреациі, памп-трек, пляжы, бістро, а в пізнійшым терміні появит ся тзв. піднебный ровер – силом своіх мязів буде мож «переіхати» ся дост долгом і видоковом трасом в повітри.

Родинный Парк Розрывкы буде одданый на яр, буде то дополніня оферты Здройового Парку, в котрым находит ся м.ін. джерело мінеральной воды Юзеф з невеличком пияльньом, є роверова стежка, силовня на повітри, боіско до ігр і альтаны. По обох странах потока сут тіж місця до пляжуваня.