Нич был Інстаґрам, был Варголь

Перед ером смартфонів і тзв. сельфі не было нич, што бы скорше діяло як апарат типу Поляройд. І певно тяжко найти інчого як Енді Варголь артисту, котрый ліпше был в силі выполнити діру медже кумштом аналоґовой фотоґрафіі а гев-і-тепер осіганым завдякы діґітальній фотоґрафіі.

В 70. і 80. роках Енді Варголь хоснувал фотоґрафію як основу своіх творів, значыт простых портретів стрічаных осіб. Артисту барз рідко мож было видіти без апарату Polaroid SX-70. Документувал праві каждый момент свого жытя в Ню Йорку. Робил знимкы камаратів, колекцийонерів, целебритів. Уважні стерюг своіх поляройдів і вперто фотоґрафувал жытя аж до свойой смерти в 1987 році.

Візуальный денник

Більше як 60 портретів та автопортретів зробленых Енді поляройдом експонуваных є на выставі пн. Andy Warhol Polaroid Pictures в Лондоні в ґалериі Бастян. Денекотры вказуваны будут першыраз. Выстава є нагодом до того, жебы видіти, як выглядал Ню Йорк 70. і 80. років ХХ ст. «од кухні», вчас творіня ся новой візуальной культуры. Уставляня ся Варголя, раз, як того, котрый смотрит, є серед публикы жытя, другій раз, як його-же елемент, а мож і речы – актор, вказує на творчу здібніст артисты як хронікаря своіх часів. Варголь утримувал, што знимка означат, же знат, де был в каждій минуті, і зато фотоґрафувал.

На експозициі буде мож видіти ощадны портреты вельох знаных целебриток, такых як Лайза Міннеллі ци Джейн Фонда – Варголь был в силі достати згоду фотоґрафувати каждого, кого стрітил. Результатом того єст особлива ґалерия слав – од проєктантів моды, як Ів Сен-Лоран, Соня Рікель, по писменників, акторів ци музиків, як Мік Джаґер, Труман Капот, Джон Ленон. Так само міцно любил Варголь фотоґрафувати самого себе, не боял ся при тым облікати в перукы ци робити мейкап. Хоснувал ріжны поляройдовы фільмы і технікы, одталь такє богатство фотоґрафій, вказуют они і неминяюче захопліня консумпцийном культуром. Окрем того, Варгольовы знимкы явили ся початком еры та соспільства здомінуваного, а часто і дефініюваного через образ і ілюзию.

Andy Warhol. Polaroids 1958-1987

В кооперациі з Фондом Енді Варголя німецкє выдавництво Ташен (найбільше на світі, якє выдає публикациі присвячены штуці) печатало книжку Andy Warhol. Polaroids 1958-1987. В альбомі поміщено соткы знимок. Сут то не лем портреты целебритів, але тіж фотоґрафіі вказуючы середовиско Варголя, його люксусове жытя, краєвиды ци мертву природу з іконічныма баньками поливкы Campbell’s. Часто суровы і імпровізуваны, поляройдовы знимкы документуют епоху Варголя, так як робит то Інстаґрам днес – є то запис теперішного світа, єднако часто є то радше його підрасувана ілюзия.

Автором книжкы є Річард Вудвард – нюйоркскій критик штукы, якій реґулярні спілпрацує з ґазетами «Уолль-стрит джорнель» ци «Ню Йорк таймс». Дописы Вудварда мож чытати м.ін. в такых писмах як «Букфорум», «Амерікан Сколяр», «Ню Йоркер», «Ваниті Фейр», «Інтервю» ци «Воґ». Його есеі о штуці і фотоґрафіі находят ся в більше як двадцетьох моноґрафіях і музейных каталоґах.