2 серпня/авґуста т.р. в Польско-Словацкым Домі ім. Д. Юрковича в Ґорлицях проходил вернісаж выставы образів лемківского маляря Штефана Телепа зо Ждыні.
Хоц єст непрофесийным малярьом і, як сам підркислял вчас привитального слова – самородным творцьом, то його творчіст остала уж не раз доцінена знавцями штукы.
Бесідувал кєрівник Польско-Словацкого Дому ім. Д. Юрковича в Ґорлицях – Кжыштоф Шадковскій, якій наконец вводного слова додал, же початкы Штефана Телепа то єдна выстава річні, а тепер мат іх найменьше пару. Образы презентуваны были м.ін. в Кракові, Варшаві, Ліґници, Креници, Вроцлаві і поза Польщом, а вельо з них находит ся в приватных колекциях на обшыри Польщы, Німец, ЗША, Канады, Австралиі а і в єдній, але істотній публичній інституциі – в Музею Модерной Штукы Енді Варголя в Меджелабірцях.
Образы Телепа, хоц в простий спосіб найчастійше представляют простых люди і іх штоденне жытя на Лемковині, міцно порушуют обзераючых штуку.
Бесідувал Збіґнєв Толь – директор Музею Дворы Карвациянів і Ґладышів в Ґорлицях. Директор, а тіж професийний артиста – різбяр, повіл іщы, же непотрібні называт ся Ш. Телепа ґорлицкым Никыфором, бо, як ствердил: «Никыфор был єден і Телеп єст єден».
Выставу обзерати мож до кінця серпня/авґуста, а найдете на ній парудесят образів од почактів творчости Ш. Телепа по остатні діла.
Коментарі