Но, то сме навышывали…

Дня 8 грудня 2013 рока в Рускій Бурсі в Ґорлицях проходили IV  Варшататы Вышываня. Як все, не завели так вышываючы артисты (того рока перший раз серед презентуючых своі рукодільны творы нашол ся і мужчына!), як і публика, яка чысленно пришла пообзерати і поподивляти майстерштыкы ручной роботы. А подивляти – істинно было што…

Імпреза зачала ся од перегляду соток (!) вышывок 16 артистів – были і святы образы, краєвиды, рослинны мотывы, звірята, обрусы, заголовкы, ручникы, кошелі, ґорсеты, блюзкы, партичкы, абстракциі і вельо, вельо інчых. Были взоры з Лемковины, Гуцульщыны, Буковины та інчых реґіонів Карпат в розмірах од маленькых, по міряны, справды, на метры.

Пак, як традыция наказує – де зыйдут ся Лемкы, там одраз одходит співаня. Заспівали (неконечні всітри Лемкыні :)) Сусяння Яра-Малецка, Маріання Яра і Наталія Малецка. A зато, же зачал ся нам різдвяний піст, одспіваных остало пару побожных, паралітурґічных пісень. Для вельох присутных люди была то перша нагода до взріня і почутя выняткового інструменту, якым є корбова ліра.

Тяжко было ся вшыткым розыйти, зато при теплій каві, гарбаті, а і дачым солодкым (або при овочах, то версія для тых, што все на диєті), терпеливі ждали сме на вердыкт. Темом тогорічного конкурса на найліпшу вышывку был орнамент (партичка).

Жырі (в склад котрого, для захованя объєктывізму, не входил нихто з бурсаків) орекло, же першы три нагороды од Руской Бурсы заняли:
І місце – Боґуслава Оґродовчык
ІІ місце – Галіна Адамяк
ІІІ місце – Анна Клясек-Віслоцка

Додатково, пасмантерийний склеп в Ґорлицях при ул. Міцкєвіча 6, зафундувал три рівнорядны выріжніня, котры достали: Галіна Ґамбаль, Гелена Нагач і Маріанна Яра.

Для вшыткых охочых уж тепер заповідаме – тема на будучий рік то ручник.
Думайте, вышывайте і не забудте ся похвалити своім ділом за рік.

Ціла імпреза одбыла ся завдякы орґанізаторці Галіні Адамяк з родином. Дякуєме.

Під тым мотузком позерайте на ЗНИМКЫ на стороні орґанізатора:  www.ruskabursa.pl, а на днях появит ся фотореляция на заприязненым з нами портали  www.elipinki.pl 

До зобачыня за рік!