Нова выглядкова вежа над Свідником дає і можливость переночовати

Нова выглядкова вежа на містом Свідник дає турістам і можливость переночовати в притулку. Як інформовала аґентура ТASR, місто єй дало выбудовати в локаліті, де даколи быв ліжарьскый влек.

„Шпеціфічне положіня міста Свідник, котре є скрыте меджі горами, дословно передзначало тото місце на выглядку на місто. Даякый актівіста уж пару років тому поставив там лавочку, на котру тірісты звыкли сідати і кохати ся выглядом, зато сьме выбрали якраз тото місце. Далшый бенефіт того місця є то, же є легко приступне і про родины з дітми, біціґлістів, ліжарів і пішых турістів, што дає досправды можность турістічного зажытку почас цілого року. У співпраці з містныма турістами, з Клубом словацькых турістів Бескід Свідник, з урбаріатом, із справцями лісів сьме приготовили проєкт,“ повіла про аґентуру TASR пріматорка міста Марцела Іванчова.

Притулок з панораматічным облаком

Подля слов пріматоркы не є то класічна выглядкова вежа, кедьже в рамках ньой находить ся і притулок з панораматічным облаком.

„Каждому, хто одважыть ся переночовати в притулку, ґарантуєме красный выгляд на місто Свідник. Мусить то мати перфектну атмосферу головно почас Рождественных свят,“ продовжовала пріматорка з тым, же 5-го децембра розсвітили рождественне окрашіня в місті, і так думать, же то буде неповторятельный зажыток про вшыткых, котры вырішать переночовати в притулку.

Треба мати што вказати

Іванчова припомянула, же по підписаню контракту з містом фірма, яка мала вежу з притулком выбудовати, стрітила ся з проблемов, котров быв недостаток дерева, головного такого, котре было напроєктоване на выбудованя той новой турістічной атракції.

Ціна проєкту была 80 тісяч евр, з чого 40 тісяч дали спонзоры, 20 тісяч дав Пряшівскый самосправный край з Вызвы про реґіон, далшых 20 тісяч евр заплатило місто.

Частьов реґіоналного розвитку є подля пріматоркы міста під Дукльов і розвиток турістічного руху. „На то, жебы сьме го годны были у Свіднику і в цілім реґіоні розвивати, треба нам мати што вказати, мати приготовлену турістічну інфраштруктуру, а самособов знати то порядно спропаґовати. У свіднику в тім році першый раз в історії зрядили сьме і класічный Турістічный інформачный центер,“ додала пріматорка.

Фото: TASR.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА