Новий beskid-niski.pl!

Уж неодолга, заприязнений з нами порталь beskid-niski.pl доцяп змінит свій дізайн, але не тото є найважнійше – найважнійше є тото, же стане ся дуже барже функцойональний, приступний і легко буде мож найти інтересуючы нас інформациі, а тых єст – легко бесідуючы – не мало!

Перебудова сайту стала ся конечна в звязку з превеликым богатством змісту, якій находит ся на портали, як і з тым, же творена была уж 10 років тому. За тоты рокы beskid-niski.pl стал ся найважнійшым компендиюм знаня про Низкій Бескiд і першым джерелом інформаций для люди, якы хотят ся дашто про него дознати. На сайті найдете десяткы і більше практычных дописів про туристыку в Низкым Бескіді, соткы статій про природу, ґеоґрафію Низкого Бескіду, але і про історию, культуру, етноґрафію та реліґію Лемків і Лемковины та тисячы архівальных і сучасных знимок, вказуючых красу Лемковины і не лем. То тіж місце дискусий, выміны інформаций, вражынь, опіній і місце цікавых, а не рідко і важных, ініциятыв, підниманых для ратуваня натуральной спадковины Низкого Бескіду.

Порталь николи не был звязаний з нияком орґанізацийом і николи не был підпорюваний жадном дотацийом – то діло єдной особы, любителя Низкого Бескіду і Лемковины – Бартломєя Вадаса. Завершыня будуваня сайту од основ єст уж барз близко, до кінця бракує уж лем 20% фондів. Каждий з нас може помочы в громаджыню бракуючой сумы – старчыт, же купите нове выданя єдного з найліпшых путівників по Лемковині – Низкій Бескід. Од Команчы до Высовы, о котрым писали сме за тым мотузком (там тіж надйете інформацию де і як купити книжку), а котрого то путівника спілавтором єст, як раз, основатель порталю – Бартломєй Вадас.

Горячо захоочуєме до купуваня путівника і – тым самым – помочы в довершыню перебудовы порталю beskid-niski.pl!