Новий директор Музею Енді Варголя в Пітсбурґу

Музей Енді Варголя мат нового директора. В пятницю, 10. марця 2017 р., заряд Карнеґійскых Музеів Пітсбурґа оголосил назвиско новопокликаного кєрівника єдного з його штырьох музеів – Музею Енді Варголя. Остал ним Патрік Мур, якій од серпня/авґуста минулого рока выполнял гын функцию тымчасового директора. Мур долучыл до музею іщы в 2011 році. Інститут Карнеґі творят штырі музеі: Музей Енді Варголя, Музей Шуткы Карнеґі, Музей Природной Істориі Карнеґі та Науковий Центр Карнеґі.

Патрік Мур (роджений 1963 р.) буде 5 директором в істориі музею, котрого простір то близко 8200 м², што справлят, же єст то найбільший в світі музей присвячений єдному артисті. Причынят ся до тіж і до того, же Пітсбурґ занимат важне місце на культуральній мапі світа, притігаючы до ся чысленных любителів штукы, критиків і туристів. В музею находит ся найбільша колекция творів Варголя і архівальных памяток.

П. Мур одкрыл місто, де вродил і выховал ся Вагроль, будучы студентом на Університеті Карнеґі-Меллон. Єст абсольвентом анґлицкой літературы і театральной режысериі. Од 1991 до 2001 рока ініциятором і директором проєкту The Estate Project – проґраму, якого цілю было звернути увагу на проблемы АІДС (з анґ. Acquired Immune Deficiency Syndrome) серед соспільности артистів. Мур єст м.ін. членом Федерациі Продуцентів Америкы. Окрем того, был м.ін. кєрівником проєкту в New York’s Livet Reichard Company і директором маркетінґу і ПР (з анґ. public relations) в The Kitchen Center for Performance в Ню Йорку.

В Пітсбурґу залюбил єм ся студиюючы на Університеті Карнеґі-Меллон, а пак Варголь стал ся моім улюбленым артистом – повіл в офіцийным выступліню. Музей Енді Варголя находит ся в вынятковым для него часі, коли маме можніст вказати Варголя з такой страны, з якой шырокій світ го іщы не знат – як фільмового творцю, котрий могучо записал ся в істориі кіна, як особу о глубокій вірі, а тіж як артисту, якій фурт влият на молодых артистів – бесідувал дале Патрік Мур. Вельо знат о світовым жытю серед найбільшых слав Енді в Ню Йорку, а мало хто здає сой справу, же выховал ся в консервативным, іміґрантскым середовиску. Для Енді отверте бесідуваня о своім гомосексуалізмі і екстраваґантскє жытя в Ню Йорку не выключало ся з бытьом глубоко віруючым – дополнил.

Єдным з найскоршых плянів П. Мура єст реалізация проєкту, якого партнером єст Музей Сучасной Штукы в Ню Йорку. Цілю того же проєкту єст здіґіталізуваня цілой фільмовой базы Варголя при участи МПС (з анґ. Moving Picture Company), студия занмиаючого ся специяльныма ефектами в фільмах, лавреата Оскара.

Чысло фільмів, якых публика іщы не виділа, єст барз великє. Істнуют лем ориґінальны награня, якы треба перше здіґіталізувати, жебы не попсути іх поміщаньом в проєкторі. Люде думают, же знают фільмы Варголя, але тоты іщы неодкрыты вкажут, якым експериментатором і візийонером был Варголь – пояснил Мур.

Карнеґійскы Музеі Пітсбуґа основаны были в 1895 році, іх фундатором был Ендрю Карнеґі. Творят іх штырі інституциі: Музей Енді Варголя, Музей Шуткы Карнеґі, Музей Природной Істориі Карнеґі та Науковий Центр Каренґі. Што рока одвиджат іх 1.4 мілийона люди.