Новий Рік

Новий Рік

Уже старий год проминул,
А новий настає,
В новым годі старе солнце
На небі остане.

В новым годі ачей старе
Солнце омолодне,
І огріє Русинове
Серденько холодне.

Ах Ты Боже! Ты владиєш
Солнцем і зьвіздами,
Прикаж солнцу, бы нас гріло,
Сьвітило над нами.

Помилуй Господи бідну
Русиньску сироту!
Оддаль од ней тисячлітню
Народну хвороту.

Просьвіти нас, бы сме свою
Познали родину,
Шастливую будучности
Дожыли годину.

Допоможи Ты, Господи!
Бы в тым Новым Годі
Русины Тобі служаще
Жыли в любви, в згоді.

Абы каждий тілко ділал
Про народ, як може.
О то просят всі Бескідці
Тебе Отче Боже.

Нашы Голосы най ся Вам дарит!
На Новий Рік желаме Вам вшыткого што найліпше і до стрічы.