Новий війт ґміны Устя Ґорлицкє (д. Рускє)

В недільных выборах, 4. листопада/новембра 2018 р., будучых догрывком в самоурядовых выборах на війтів, бургомайстрів і президентів міст, на пятлітню каденцию новым війтом ґміны Устя Ґорлицкє (д. Рускє) был выбраний Збіґнєв Людвін.

В другым етапі самоурядовых выборів на становиско війта Збіґнєв Людвін конкурувал з Томашом Андрусікєвичом. В першым етапі, якій проходил 21. жолтня/октробра, окрем реченых двох кандидатів, стартувал іщы Андрий Палюх, двадцеддевятлітній маґістер права, маючий лемківскє походжыня, якій одпал в першым етапі. Товды же, никотрий з двох найсильнійшых кандидатів не отримал чысла голосів повыже половины, прото оба стрітили ся в догрывці.

В другым голосуваню З. Людвін отримал 1636 голосів (53,99%), а Т. Андрусікєвич невельо меньше, бо 1394 голосів (46,01%). Людвін, якій походит з Устя, был попераний через одходячого війта Димитрия Рыджанича, якій за остатній 17 років рядил ґміном.

Новий війт выходит з політичного середовиска свого попередника. За послідніх 25 років был радником устяньской ґміны, а через штырі каденциі полнил фукнцию ведучого рады ґміны. За своі найблизшы пріоритеты бере схваліня нового буджету та будову каналізациі в Высовій і водотягніня на інчых селах.

Новий війт буде рядил ґміном, в якій одсоток Лемків на фоні цілого населіня перевысшат 10%. Устя Ґорлицкє свойом обшырю обнимат декотры лемківскы села, в котрых доднес прожывают в білшьости Русины. Надієме ся, што діяня нового війта підут на хосен м.ін. лемківской етнічной меншыны.