Новосільскій на Украіні. Буде выставлюваный і в Ужгороді

В минулый віторок на обшыри Михайлівского Златоверхого Монастыря в Кыйові одкрыто выставу творчости Юрия Новосільского під назвом «Сучасна ікона – Юрий Новосільскій». З експозицийом мож ся запознати з нагоды десятой річниці смерти артисты (1923-2011).

Выставу орґанізує Польскій Інститут в Кыйові при спілпраци з Центром Сучасной Штукы Уяздовскій Замок і Фундацийом Елеос-Украіна. Вчас одкрытя выставы підкрислено, што Новосільскій был Лемком, якій свідомо в своім пізнійшым жытю выбрал східню духовіст і в тым напрямі зосередил свою творчіст.

Орґанізаторы выставы підчеркуют тіж, же робота Новосільского знана є і в православных, і грекокатолицкых, і римокатолицкых святынях. Автор свойом творчістю отверал іщы шырше культурову простір серед східнім а західнім християнством.

В Кыйові выстава буде доступна до 12. жолтня/октобра. Пак повандрує до найбільшых міст Украіны: Чернігова, Полтавы і Харкова. На сам конец Юрий Новосільскій завитат на Підкарпатску Русь. Його творчіст буде мож видіти в Ужгороді. Вандрівка закінчыт ся в грудни/децембрі тр.