Новосільскій. Прикладна метафізика

Днес, 8. лютого/фебруара т.р. од 18.00 год., проходит в Варшаві дебата про творчіст Юрия Новосільского. Орґанізує єй редакция Політичного Богословя. Дебаті дано наголовок – Прикладна метафізика.

Серед запрошеных до бесіды сут Кристина Черні з Ягайлоньского Університету, єпископ Михал Яноха, професор Варшавского Університету, Матеуш Сьродонь зо Студиюм Християньского Сходу. Модераторком стрічы є Наталия Шершень з редакциі маґазину Політичного Богословя.

Цілю участників дебаты є зосередити ся на ідеях, котры інспірували того ориґінального артисту, при єдночасным задуманю ся, ци мож в них глядати одповід о сенс прониканя ся штукы, теолоґіі і метафізикы. Юрий Новосільскій то выдатний артиста, котрому не мож припняти ниякой емблемы. Його творы лучат сакрум і профанум, еротизм з містиком, провокуют до особливого задуманя над метафізиком. Новосільскій сігал так до християньской традициі Сходу, як і до трендів присутных в культурі Заходу, што дозваляло му вказувати глубше розумліня чловечого істнуваня. Про тото та про інче мож днес слухати вчас дебаты та більше прочытати в 93. ч. Політичного Богословя, котрий печатаний был початком того рока з нагоды 95. річниці народин артисты.