Новы черезгранічны проєкты ПСК за 11 міліонів евр і в русиньскых реґіонах

Веце міст і сел в Пряшівскім самосправнім краю (ПСК) буде реалізовати вдяка Проґраму Interreg Польща – Словакія 2021 – 2027 атрактівны проєкты турістічного руху, електромобілности і інштітуціалной співпраці. Інформує о тім Одділіня комунікації ПСК.

Комітет моніторованя споминаного проґраму схвалив про теріторію краю цілково єденадцять проєктовых замірів за 11,1 міліона евр. Реалізовати ся будуть в періоді років 2024 – 2027, і їх цілкова вартость про словацько-польске приграніча представлює майже 29 міліонів евр.

Потішуючім фактом є, же часть тых проєктів буде реалізовати ся в русиньскых реґіонах. Такым проєктом є наприклад Місце про час, на котрім бере участь Шарішскый музей в Бардейові. Замір підпорить розвиток черезгранічной інтеґрованой турістічной оферты польского музея в Коросні, як і бардейовского музея.

„Трифазовый проєкт принесе конкретно на словацькім боці ревіталізацію і обновліня ставебно-технічного стану обєктів сканзену народной архітектуры в Бардейовскых Купелях. Замірять ся так само на посилніня співпраці меджі обидвома музеями,“ пише Одділіня комунікації ПСК. В споминанім сканзені суть і деревяны будовы з русиньскых сел реґіону.

Місто Свідник буде партіціповати на проєкті Вєдно за здорове приграніча.  На теріторії ПСК дістав схваліня і єден проєкт із области електромобілности, на котрый было выділеных 127 тісяч евр. Іде о проєкт Пробадайте польско-словацькы Бєщады посередництвом електромобілности, в котрім є партнером русиньске село Вышня Ядлова в окресі Свідник.