Новы русиньскы книгы на торгу в Белеграді

Од 21-го до 29-го октобра 2023-го року проходить 66-ый річник Меджінародного торгу книжок в Белеграді. Уж традічно суть на нім каждый рік презентованы і русиньскы выданя, котры приготовили Русины з Войводины.

Іншак тому не было ани тот рік. Як інформовала аґентура Рутенпрес, новы русиньскы выданя были одпрезентованы в понедільок 23-го октобра. Презентовали двоми выдавателі – Руске слово і Завод про културу войводиньскых Русинів із Нового Саду.

Промоція книг проходила в презентачнім пункті, котрый на торгу має Покраїньскый секретаріят про културу, публічне інформованя і реліґійны комуніты. Выдавательство Руске слово представило досправды свіжы выданя, а не было їх мало, што свідчіть о тім, же то велика і жывотаспособна русиньска выдавательска інштітуція.

Меджі презентованыма книгами од выдавательства Руске слово были наприклад Як гуторя дїдове швет бул давно иншаки – студия о основних традицийних характеристикох Руснацох у Бачки и Сриме од Владиміра Елеліньского Миколкы, книга з назвов 21 – поезия и проза, під котрой авторство підписав ся Саша Палєнкаш ці Сладки кари – писнї за рецитованє од Меланії Римар. Одпрезентована была і шпортова тематіка вдяка книжці 100-рочнїца Фодбалского клубу Русин, што є богато ілустрована публікація выдана з нагоды юбілея керестурьского фотбалу, але на торгу навщівници мали можливость видіти і далшы выданя.

О презентованых выданях бісідовали навщівникам Микола Шанта, Іріна Гарді Ковачевіч, Меланія Римар, Блажена Хома Цветковіч, Сашо Палєнкаш, як і шеф выдавательства Руске слово Борис Варґа.

Завод про културу войводиньскых Русинів презентовав на торгу в Белеграді Анґлийско-руски словнїк професора Михайла Фейсы і колектіву. Якраз Фейса вєдно із директором завода Сашом Сабадошом на презентації бісідовали о значіню той публікації, котра є вызначнов про русиньску лінґвістіку але і цілково про Русинів.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА