Новы перспектівы мадярьскых Русинів

Як повідомив мадярьскый сайт Hajdú Online, в Дебрециньскім районі Йовжа надіяють ся, же новый Русиньскый дім часом стане ся духовным і соспільным центром Русинів в Мадярьску. Першый камінь быв положеный в місяці юлій.

Русиньскый дім

Мадярськы Русины прближыли ся ку новому цілю. В місяці юлій торжественно быв заложеный первый камінь фундамента ґрекокатолицького Русиньского путницького дому, котрый поблагословив намістник Гайдудороґского церьковного округа. В приговорі почас торжественной події Ріхард Тірчі, ведучый одділіня про народности Міністерства людськых жрідел Мадярьска, „звернув увагу на тото, же хоць Русины і не мають своюй державности, што є смутным про вшыткых, но мають свій дім ‒ Ґрекокатолицьку церьков.“

Віра Ґіріц, представителька Русинів у мадярьскім парламенті, повіла, же процес, котрый зачав ся минулого рока, дав свої плоды і теперь є можливость будованя Русинського дому.

„Русинів все споминають, кідь говорять о Підкарпатю і Мадярьску,“  цітує мадярьскый портал Віру Ґіріц, „но історія ся роспорядила так, же они теперь жыють і у сусідніх державах, но в Мадярьску ся чувствують як дома.“

Русинськый дім буде мати подля Ґіріц важну роль, бо Русины надіяють ся, же дякуючі нього будуть ся надвязовати контакты і з русинськыма орґанізаціями із сусідніх держав.

„Ту будеме годны ся стрічати, бісідовати і коордіновати свої дії в будучности,“ повіла Віра Ґіріц на події заложіня первого каміня Русиньского путницького дому.

Русины в Мадярьску

Ку Русинам в Мадярьску за остатнім переписом населіня, котре проходило у 2011-ім році, приголосило ся 3882 людей. В порівнаню із переписом з року 2001 чісло Русинів наросло о 186 процент. Днесь в Мадярьску творять русинську комуніту автохтонны Русины, котры на тых теріторіях жыли цілы столітя, як і переселенці, головно із Підкарпатя, якы там пришли за роботов і зістали там.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА